Апавяданне Святланы Курс (Евы Вежнавец) «Гаючая нянавісьць» з’явілася ў аўдыёверсіі на платформе SoundCloud. Твор выйшаў у межах новага праекта Gutenberg Publisher «Голас аўтара».
У рамках гэтай ініцыятывы чытачы змогуць пачуць фрагменты твораў, прачытаных самімі аўтарамі. Першы выпуск акурат распачала аўтарка «Па што ідзеш, воўча?» і «Шлях дробнай сволачы».
Само апавяданне «Гаючая нянавісьць» будзе апублікавана ў красавіку ў аднайменным зборніку. У яго ўвойдуць тэксты Святланы Курс, што публікаваліся ў часопісах і газетах раней, але не выходзілі як асобная кніга.
«Гэта іранічная і вельмі жывaя гісторыя пра вяртанне з Захаду на Усход, пра фемінізм, сумневы, размовы ў дарозе і пра тое, як ідэі сустракаюцца з рэальным жыццём», — піша выдавецтва пра «Гаючую нянавісьць».
Аўдыёверсія сталася магчымай дзякуючы падтрымцы Wisła Vision Studio.
Апавяданне можна паслухаць як падкаст або дарожную гісторыю, — звяртае ўвагу каманда Gutenberg Publisher.
Слухаць яго можна тут.
Падпісвайцеся на культурныя навіны Reform.news у Telegram
