19 лютага ў аўстрыйскім Kunsthaus Graz адбудзецца адкрыццё выставы Цемры — мастачкі, якая праз сваю творчасць даследуе тэмы рэпрэсій, выгнання і непарыўнай сувязі з домам.
Цэнтральнай часткай экспазіцыі стане мультыдысцыплінарны праект «Зямлячка» (Ziamliačka). Гэта адначасова і перформанс, і інсталяцыя, якая працуе з нашымі пачуццямі на глыбінным узроўні.
Асновай праекта стала беларуская зямля, якую таемна перавезлі ў Польшчу.
З гэтай глебы быў экстрагаваны спецыфічны пах. Гэта своеасаблівы «алфакторны архіў» Радзімы, якая зараз застаецца недасяжнай для мастачкі і тысяч іншых беларусаў.
Зямля, змешчаная ў мінімалістычны шкляны куб, ператвараецца ў «палітычнае цела». Яна перасякае межы, якім нельга супрацьстаяць фізічна, і захоўвае калектыўную памяць.
Выстава адкрыецца 19 лютага ў 18:00. Падчас вернісажу Цемра правядзе паэтычна-меланхалічны перформанс, у якім будзе спяваць пра сваю Радзіму, злучаючы гук, водар і візуальныя вобразы ў адно цэлае.
Цемра жыве ў эміграцыі ў Варшаве з 2022 года. У сваіх працах яна часта выкарыстоўвае нацыянальныя сімвалы і коды як знакі супраціву і нязломнасці.
Падпісвайцеся на культурныя навіны Reform.news у Telegram
