Фота: bolshoibelarus.by
У першай палове чэрвеня 2025 года стала вядома, што Нацыянальны тэатр оперы і балета Беларусі плануе ў жніўні выступіць у акупаваным Крыме, і артыстаў адпраўляюць туды ў добраахвотна-прымусовым парадку. Пра гэта выданне «Люстэрка» даведалася з некалькіх не звязаных паміж сабой крыніц. Цяпер «Люстэрка» высветліла, што калектыў у Крым не паедзе — і, мяркуючы з усяго, да скасавання скандальных гастроляў прывяло менавіта абнародаванне праблемы.
Гастролі балетнай трупы тэатра былі запланаваныя на другую дэкаду жніўня гэтага года. Беларусы пад кіраўніцтвам расійскага дырыжора Арцёма Макарава, які з 2025 года стаў мастацкім кіраўніком калектыву, планавалі прывезці ў Севастопаль на Міжнародны фестываль оперы і балета «Херсонес» балет «Жызэль».
Сёння, 30 ліпеня, з’явілася праграма гэтага фестывалю, беларусаў у афішы няма.
Па інфармацыі «Люстэрка», адмова ад паездкі выклікана якраз рэзанансам, які ўзнік пасля публікацыі. Тым больш, што калектыў, як казаў адзін з суразмоўцаў, быў «у асноўным супраць» паездкі ў Крым. Нягледзячы на ціск на артыстаў, у тым ліку намёкі на праблемы ў далейшай кар’еры, нямала людзей напісала адмову, у прыватнасці ў аркестры.