Два дні — з 31 жніўня па 1 верасня — у горадзе Івацэвічы праходзіў XXXI Дзень беларускага пісьменства.
Ініцыявала гэты фэст трыццаць гадоў таму Міністэрства культуры і друку Беларусі пасля святкавання 500-годдзя з дня нараджэння Францыска Скарыны. Упершыню Свята беларускага пісьменства і друку адбылося 28 жніўня 1994 года ў Полацку.
Штораз для святкавання выбіраецца новы горад.
Гэтым разам — Івацэвічы.
Паглядзелі, як змяніўся фэст за гэты час, і высветлілі, што беларускае пісьменства апынулася на ім на другіх ралях.
![Вайна, прэзідэнцтва, ураджай - як прайшоў Дзень беларускага пісьменства ў Івацэвічах](https://reform.news/wp-content/uploads/2024/09/abef20ef-f534-420b-9ab0-f53f8ec52f21.jpg)
Афіцыйны канцэпт свята гучыць наступным чынам: «Асноўная ідэя свята – ашчаднае захаванне і развіццё духоўнай спадчыны Беларусі, прапаганда нацыянальных культурных традыцый, паказ іх узаемасувязі са славянскімі вытокамі і з сённяшнім днём, дэманстрацыя сталага клопату дзяржавы пра духоўна-маральнае развіццё грамадства праз падтрымку кнігі і чытання, нацыянальнай літаратуры і кнігавыдавецкай справы».
![Вайна, прэзідэнцтва, ураджай - як прайшоў Дзень беларускага пісьменства ў Івацэвічах](https://reform.news/wp-content/uploads/2024/09/7f88b4c1-cdfd-4f8a-88d0-a136b5cce981.jpg)
Аднак праграма мерапрыемства здзіўляе, бо акрамя падзей, хоць нейкім чынам звязанымі з літаратурай, адбыліся: міжнародны круглы стол «Время выбрало нас»; выстава, прысвечаная 80-годдзю вызвалення Беларусі; выстава, прысвечаная 30-годдзю Канстытуцыі Рэспублікі Беларусь і 30-годдзю інстытута прэзідэнцтва ў Рэспубліцы Беларусь; тэматычная выстава, прысвечаная году якасці, адкрыты турнір па хакеі з шайбай, футбольны матч і прэзентацыя фільма «Брестская крепость», эксклюзіўны паказ фільма «Приказано жить» (сумесны праект Івацэвіцкага раёна Брэсцкай вобласці і Пензенскай вобласці Расійскай Федэрацыі), паказальныя выступленні па адзінаборствах.
![Вайна, прэзідэнцтва, ураджай - як прайшоў Дзень беларускага пісьменства ў Івацэвічах](https://reform.news/wp-content/uploads/2024/09/8f07bf57-488f-4aa3-b5fa-55a331d792ea.jpg)
![Вайна, прэзідэнцтва, ураджай - як прайшоў Дзень беларускага пісьменства ў Івацэвічах](https://reform.news/wp-content/uploads/2024/09/457798692_3904095423244338_1933329774642647102_n.jpg)
«Разыначкай» свята стала ваенна-гістарычная рэканструкцыя, прысвечаная партызанскаму руху на тэрыторыі Івацэвіцкага раёна.
Што тычыцца літаратурнага складніка, то трэба аддаць належнае, былі і цалкам вартасныя мерапрыемствы, як прэзентацыя факсімільных выданняў помнікаў беларускага пісьменства XVI стагоддзя Жукавіцкага і Брэсцкага Евангелляў, выстава шэдэўраў калекцыі і ўнікальных артэфактаў музея-запаведніка «Нясвіж».
Адбыўся традыцыйны фестываль кнігі і прэсы.
Знайшлося месца рэспубліканскаму творчаму конкурсу сярод журналістаў СМІ на тэму ўборачнай кампаніі 2024 года «Хвала рукам, что пахнут хлебом». Абвясцілі пераможцаў Нацыянальнай літаратурнай прэміі.
![Вайна, прэзідэнцтва, ураджай - як прайшоў Дзень беларускага пісьменства ў Івацэвічах](https://reform.news/wp-content/uploads/2024/09/c6907fc0-f9b6-4e1b-a0ef-2db4404824c8.jpg)
![Вайна, прэзідэнцтва, ураджай - як прайшоў Дзень беларускага пісьменства ў Івацэвічах](https://reform.news/wp-content/uploads/2024/09/ec73a699-2e2c-49a2-ba2d-51bcc9c07060.jpg)
Кірунак праграмы быў зададзены прысвячэннем фэсту двум юбілеям: 80-годдзю вызвалення і 30-годдзю інстытута прэзідэнцтва. Невядома, паводле якой логікі гэтыя даты былі спалучаны паміж сабой і змешчаны ў праграму Дня беларускага пісьменства, некалі інспіраванага юбілеем Францыска Скарыны. Дарэчы, імя апошняга ў праграме свята не прысутнічае ўвогуле, постаць друкара ў якасці дэкаратыўнага элемента засталася на афішы.
Увогуле падчас фэсту перыядычна з’яўляецца пытанне: «Прычым тут пісьменства, і тым больш — беларускае?».
У 2025-м Дзень беларускага пісьменства будзе адзначацца ў Лідзе.
Падпісвайцеся на культурныя навіны Reform.news у Telegram
Если вы нашли ошибку, пожалуйста, выделите фрагмент текста и нажмите Ctrl+Enter.