Аблічбаваная «Сафія Кіеўская», 3D-мадэль. Фота: suspilne.media.
Комплекс сабора «Сафія Кіеўская», які ўваходзіць у спіс Сусветнай спадчыны ЮНЕСКА, быў аблічбаваны метадам лазернага сканавання, піша «Суспільне культура».
Ідэя ўзнікла ў сувязі з поўнамаштабным уварваннем Расіі, бо цяпер кожны дзень узнікае пагроза пашкоджання або знішчэння помніка.
Лічбавая копія сабора таксама стварае новыя магчымасці для даследавання, кантролю і захавання помніка.
Для праекта быў выкарыстаны аўстрыйскі лазерны сканер RIEGL VZ-400 з прымацаванай калібраванай камерай Sony: найноўшыя тэхналогіі дазваляюць атрымаць падрабязнае апісанне паверхняў з дакладнасцю да міліметра. Сканаванне — гэта фіксацыя ўсяго ў 3D-прасторы з дакладнымі вымярэннямі. Яно было зроблена з больш за 1000 так званых станцый – кропак, на якія ставіцца лазерны сканер, і ён круціцца і збірае даныя.
За тыдзень украінская каманда Skeiron аблічбавала экстэр’ер і інтэр’ер сабора па больш чым 800 пазіцыях. Увесну была невялікая наступная здымка на адзін дзень.
Цяпер аблокі кропак і фатаграфіі (іх у гэтай тэхналогіі мільярды) можна выкарыстоўваць для падрабязных 2D-планаў або 3D-мадэляў. Для архітэктараў і гісторыкаў такі малюнак можа паказаць, наколькі нахілена збудаванне, ці ёсць скрыўленні на сценах або расколіны. А таксама выявіць падземныя лёхі.
Аблічбоўка прайшла ў рамках праекта «Захаваем украінскую спадчыну». У межах гэтага праекта аддаецца прыярытэт спадчыне ЮНЕСКА і прыфрантавым тэрыторыям, каб максімальна захаваць помнікі, якія знаходзяцца пад пагрозай абстрэлаў. 3D-копіі стануць асновай для аднаўлення помніка ў выпадку яго разбурэння падчас вайны.
Падпісвайцеся на культурныя навіны Reform.by у Telegram