У Варшаве прэзентавалі даведнік «Узнагароды Беларусі»

Падчас канферэнцыі «Новая Беларусь», што праходзіць у Варшаве, прэзентавалі даведнік «Узнагароды Беларусі».

Выданне дэманструе плён дзейнасці Геральдычнай рады «Пагоня», створанай 19 жніўня 2022 года. Рада аб’яднала геральдыстаў, гісторыкаў, мастакоў у галіне сімволікі, эмблематыкі і ўніфармістыкі, а таксама экспертаў у шэрагу іншых кірункаў.

Мэта грамадзянскай ініцыятывы — вырашэнне праблемаў нацыянальнай сімволікі, геральдыкі, эмблематыкі, узнагароднай сістэмы, уніфармістыкі і атрыбутыкі.

Новая сістэма ўзнагарод ствараецца паводле прынцыпаў беларусацэнтрычнасці. Узнагароды маюць арыгінальную ізаграфію ў выглядзе шасцікутных калодак, медальёнаў, крыжоў, ордэнскіх зорак і адпавядае еўрапейскім традыцыям.

На думку Рады, «сучасная лукашысцкая сістэма ўзнагарод не з’яўляецца прыкладам арыгінальнасці ці выдатнага дызайну, як гэта маецца ў іншых зніклых ці пакуль яшчэ існуючых дыктатурах.

Усе цяперашнія афіцыйныя ўзнагароды постсавецкай Беларусі выкананы збольшага ў савецкай стылістыцы і эстэтыцы. Часам яны не больш як копіі ўзнагарод СССР, што толькі падкрэслівае іх другаснасць.

Спробы ўвесці ў савецкі камплект сапраўды беларускія ўзнагароды ў 1990-я гады скончыліся няўдала: напрыклад, ордэн Кастуся Каліноўскага ніколі не ўручаўся і быў скасаваны паводле рашэння А. Лукашэнкі.

А ідэалагічна нейтральныя ўзнагароды, у тым ліку медаль і ордэн Францыска Скарыны, за час дыктатуры былі цалкам дыскрэдытаваны, паколькі шмат хто з узнагароджаных імі нічым не вызначыліся перад Беларуссю — а часам і наадварот, з’яўляюцца адкрытымі ворагамі нашай дзяржавы і нашага народа».

Усяго ў даведніку апавядаецца пра 23 узнагароды:

• шэсць ордэнаў: Герояў Беларусі, Усяслава Чарадзея, Нябеснай Апякункі Беларусі, Пагоні, Кастуся Каліноўскага, Жалезнага Рыцара;
• шэсць крыжоў: Змагання Тадэвуша Касцюшкі, Ахвярнасці Эміліі Плятэр, Партызанскі Народны, Свабоды, Адраджэння Беларусі (братоў Луцкевічаў), Добрасуседства;
• 11 медалёў: за баявыя заслугі, за адвагу, партызана, да 100-годдзя БНР, ордэна Пагоні, Няскораных Ларысы Геніюш, Сцяга імя Клаўдзія Дуж-Душэўскага, Францыска Скарыны, Гонар і Годнасць, за дапамогу Беларускаму войску, за плённую працу на карысць Беларусі.

Кожная ўзнагарода, акрамя графічнай выявы, змяшчае падрабязнае апісанне элементаў, а таксама спосаб нашэння.

Узнагароды, распрацаваныя радай, ужо цягам некалькіх гадоў уручаюць Рада Беларускай Народнай Рэспублікі, Аб’яднаны пераходны кабінет Беларусі і Часовая вайсковая камісія Беларускай вызвольнай арміі.

Выданне ўжо выкладзена ў адкрыты доступ.

Падпісвайцеся на культурныя навіны Reform.news у Telegram