Кінатэатр «Масква» абяцалі ўвесці ў эксплуатацыю 9 траўня, але ўрачыстае адкрыццё правялі раней, 7 траўня, сёння можна трапіць на першы сеанс, паведамляе агенцтва «Минск-Новости».
Работы па абнаўленні кінатэатра «Масква» цягнуліся з восені 2023 года. У выніку замянілі дах, «перасабралі» дзве лесвіцы, узмацнілі некаторыя канструкцыі, дэмантавалі практычна ўсе ўнутраныя перагародкі і тэхналагічнае абсталяванне, змантавалі прытокавыя выцяжныя камеры і сантэхніку, фасад аднавілі практычна ў ранейшым выглядзе.
Сам будынак абклалі керамагранітам, які імітуе прыродны мармур. Старое вітражнае шкленне замянілі на энергаэфектыўнае мультымедыйнае, абнавілі ўсе свяцільнікі.
Пры гэтым засталіся некранутымі 15 медных шчытоў над узроўнем другога паверха, якія сімвалізуюць рэспублікі СССР.
За кошт перапланіроўкі замест дзвюх залаў будуць працаваць чатыры: два на 48 і па адным на 654 і 233 месцы. Па словах спецыялістаў, па сваёй функцыянальнасці і тэхнічных магчымасцях яны нічым не саступаюць залах у больш «маладых» кінатэатрах горада. Іх абсталявалі найноўшымі праектарамі і гукавымі сістэмамі, здольнымі забяспечыць высокую якасць малюнка і гуку, а таксама зручнымі крэсламі.
Паклапаціліся і пра людзей з абмежаванымі магчымасцямі — для камфортнага перамяшчэння змантаваныя спецыяльныя пад’ёмнікі.
Фішкай установы стане кінабар.
Кінатэатр «Масква» ўвялі ў эксплуатацыю неўзабаве пасля Алімпіяды-80. Кінатэатр стаў першым шырокафарматным у Беларусі, дзе размясцілася дзве залы.