У галерэі Pristine Contemporary ў сталіцы Індыі Нью-Дэлі адкрылася выстава дзвюх мастачак Дашы Бубен і Ціліні Джынадасы «What Memory Built in Colour» («Што памяць пабудавала ў колеры»). Выстава аб’ядноўвае творы беларускай мастачкі з Берліна Дашы Бубен і мастачкі са Шры-Ланкі Ціліні Джынадасы, заснаваныя на эмоцыях і выразнай сіле колеру.
Праекты Дашы Бубен «Яркія ўспаміны пра рэчы, якія ніколі не здараліся са мной» і «Сакрэт адценняў» Джынадасы — пра тое, як успамін і ўяўленне злучаюцца ў абстракцыі, а колер становіцца сродкам разважанняў і пачуццяў.
На гэтай выставе мастачка і фатографка Даша Бубен паказвае дзевятнаццаць работ, якія даследуюць зменлівую і ненадзейную прыроду памяці. З дапамогай шматслаёвай абстракцыі і яркіх тонаў яна перакладае мімалётныя ўражанні і ўяўныя моманты ў разважанні аб ідэнтычнасці і ўспрыманні.
Працэс стварэння гэтых жывапісных палотнаў Даша апісала ў адным з інтэрв‘ю: «Я выліваю фарбу на падрыхтаванае палатно, адключаюся ад свету, выключаю ўсё, бяру палатно ў абедзве рукі і раскачваю яго ў рытме сваёй унутранай мантры, рухаючыся плаўна і дазваляючы фарбе расплывацца».
Падпісвайцеся на культурныя навіны Reform.news у Telegram