Філалагічны факультэт Беластоцкага ўніверсітэта адкрывае новы кірунак вочнай формы — беларуская этнафілалогія.
Спецыяльнасць адрэсавана выпускнікам сярэдніх школ рэгіёну, а таксама кандыдатам з Беларусі, якія пражываюць на Падляшшы. Набор на курс будзе ажыццяўляцца ўжо ў гэтым годзе.
— Беларуская этнафілалогія — гуманітарная спецыяльнасць, якая прапануе ўнікальнае спалучэнне лінгвістычных, літаратурных і культурных ведаў, што дазволіць студэнтам набыць усестароннія моўныя і культурныя кампетэнцыі, — апісвае новы напрамак намесніца дэкана па навуцы і міжнародным супрацоўніцтве Філалагічнага факультэта Беластоцкага ўніверсітэту, доктар Беата Пецыхна.
У вучэбную праграму курса ўвойдуць лекцыі па беларускай мове, літаратуры і культуры, а таксама такія прадметы як «Філасофія і рэлігійная думка», «Выбраныя пытанні візантыйскай культуры», якія ўлічваюць разнастайнасць рэлігійных поглядаў беларусаў. Таксама студэнты будуць вывучаць матэрыяльную і духоўную культуру Падляшша.
Адметнасцю напрамку стане прадмет «Аналіз тэкстаў Вялікага Княства Літоўскага», звяртаюць увагу распрацоўшчыкі праграмы.
Выпускнікі новай спецыяльнасці змогуць працаваць, між іншым у сродках масавай інфармацыі, выдавецтвах, установах культуры ці дзяржаўных інстытуцыях. Пасля атрымання кваліфікацыі настаўніка таксама можна будзе працаваць у школе.
Падпісвайцеся на культурныя навіны Reform.news у Telegram