Падводныя знаходкі. Фота: t.me/iinanb
Навукоўцы Інстытута гісторыі НАН Беларусі сумесна з дайвінг-цэнтрам «Марскі Пегас» упершыню выявілі на тэрыторыі Беларусі рэшткі затопленага ўмацаванага паселішча XII-XIII стагоддзяў, — паведамляе тэлеграм-канал Інстытута гісторыі Нацыянальнай акадэміі навук.
Паселішча круглай формы дыяметрам каля 50 метраў акружана двума радамі гарадзен агульнай таўшчынёй 10 метраў, у дадзены момант яно знаходзіцца на дне вадаёма на глыбіні ў сярэднім 1 метр.
У ходзе разведачнай экспедыцыі быў зняты план паселішча, сабраны пад’ёмны матэрыял – упрыгожанні (колты, пярсцёнак, кальцо, накладка, прывеска, бранзалет), зброя (баявая сякера, наканечнікі суліц), прылады працы (пешня, тэсла), прадметы побыту (ключ, фрагменты разнавагаў), ганчарная кераміка. Таксама было выяўлена некалькі фрагментаў гаршкоў культуры штрыхаванай керамікі, датаванай жалезным векам.
Папярэдне можна заключыць, што дадзенае паселішча было знішчана ў ходзе ваеннага канфлікту ў XIII стагоддзі і ў дадзены момант уяўляе сабой недаследаваны, закансерваваны вадой, закрыты археалагічны комплекс.
Восенню або зімой плануецца поўнамаштабнае даследаванне, пасля якога будзе названая дакладная геалакацыя паселішча. Цяпер жа месца не раскрываецца, каб яго не знайшлі чорныя капальнікі.
Падпісвайцеся на культурныя навіны Reform.news у Telegram