Мэр горада Утрэхта Шарон Дэйксма ўручае ўзнагароду Святлане Алексіевіч на Міжнародным літаратурным фестывалі ILFU. Фота: Maarten Mooijman.
Святлана Алексіевіч стала лаўрэаткай міжнароднай ганаровай прэміі ад буйнога Міжнароднага літаратурнага фестывалю ILFU у Нідэрландах. Учора ўвечары пачэсную ўзнагароду — пярсцёнак Belle van Zuylen ring — на літаратурным форуме ёй уручыла мэр горада Утрэхта — Шарон Дэйксма. «Літаратура — гэта сродак поліфаніі, як аніякі іншы», — павіншавала спадарыня Шарон беларускую нобелеўскую лаўрэатку, падкрэсліўшы «шматгалоссе» творчасці пісьменніцы. Пярсцёнкам імя Бэль ван Зёйлен (Belle van Zuylen), названым у гонар галандска-швейцарскай аўтаркі, адзначаюцца літаратары, чыя творчасць мае вялікае грамадскае значэнне.
Узнагароджанне Святланы Алексіевіч адбылося ў межах фестывальнага ўікенда ILFU — культурнай падзеі «Даследуючы гісторыю»». Можна сказаць, што арганізатары фэсту падрыхтавалі адмысловую праграму, прысвечаную Беларусі, кульмінацыяй якой стала ўзнагароджанне літаратаркі.
Так, у межах праграмы, арганізаванай у супрацоўніцтве з ПЭН-клубам Нідэрландаў, адбылася дыскусія нідэрладскага гісторыка і журналісткі Франкі Гумельс і беларускай паэткі, пісьменніцы Юлі Цімафеевай — у ёй аўтаркі абмяркоўвалі сітуацыю ў Беларусі, пісьменніцкую дзейнасць Святланы Алексіевіч і актывізм.
Гэтаксама асобнай доўгачаканай імпрэзай сталася публічная лекцыя Святланы Алексіевіч у «Герцы».
«Я ня думаю, што цяпер буду ўдавацца ў бягучыя праблемы: пандэмія каронавірусу, вайна ва Ўкраіне, хісткая дэмакратыя… Я магу толькі расказаць вам, як я пішу новую кнігу. Як я шукаю новыя словы для ўсяго ў гэтым новым свеце, у якім мы цяпер жывем», — цытуе словы аўтаркі «Час сэканд-хэнд», «У вайны не жаночае аблічча», «Цынкавых хлопчыкаў» ды іншых вядомых твораў каманда фестывалю.
«Вашы кнігі паказваюць, што голас, голас асобы, можа даць штуршок гісторыі, якога ніхто не чакае», — сказала пра творчасць беларускай аўтаркі падчас імпрэзы галандска-беларуская пісьменніца Ліза Віда (Lisa Weeda).
Гэтаксама на форуме адбылася аўтограф-сесія Святланы Алексіевіч — атрымаць аўтограф беларускай аўтаркі выстройваліся чэргі.
З 2019 года прэмія Belle van Zuylen ring уручаецца пісьменнікам, якія ў сваіх творах актыўна закранаюць сацыяльныя тэмы. Раней пярсцёнак, названы ў гонар сусветна вядомай Утрэхцкай пісьменніцы Бэль ван Зёйлен (1740-1805), якая ў сваёй творчасці надавала вялікую ўвагу роўнасці і эмансіпацыі, атрымалі Чымаманда Нгозі Адычы, Маргарэт Этвуд і Алена Феррантэ. Пярсцёнак, распрацаваны мастачкай і ювелірам Карын Віхерс, з’яўляецца сумеснай працай муніцыпалітэта Утрэхта і ILFU.
ILFU — найбуйнейшы літаратурны фестываль у Нідэрландах, які доўжыцца два тыдні, прадстаўляе больш за 200 аўтараў і набірае больш за 20 000 наведвальнікаў. Фестываль зарадзіўся ў 1980 годзе, калі ў канцэртнай зале TivoliVredenburg ва Утрэхце на 2000 месцаў была арганізавана першая вечарына галандскай паэзіі (Nacht van de Poëzie). Нягледзячы ні на што, мерапрыемства, якое доўжылася 8 гадзін да самай раніцы, прыцягнула тысячы наведвальнікаў. За дзесяцігоддзі ILFU фестываль ператварыўся ў адно вялікае свята літаратуры, якое ахоплівае мноства жанраў: ад паэзіі да публіцыстычнай літаратуры, ад якасных фільмаў да літаратурнага тэатра і апавядальнага візуальнага мастацтва.
Падпісвайцеся на культурныя навіны Reform.news у Telegram