Андрэй Хадановіч, Дар’я Бялькевіч, Таццяна Нядбай, Уладзь Лянкевіч, Наста Кудасава, Артур Камароўскі, Юля Цімафеева, Мікіта Найдзёнаў, Дзмітрый Строцаў. Вершы беларускіх паэтаў і паэтак гучалі ўчора падчас «Паэтычнай кантаты» ў Касцёле Святога Аляксандра ў Варшаве. Прэм’ера твора беларускіх кампазітараў адбылася ўчора ў межах фестывалю інтэлектуальнай кнігі Pradmova, стаўшы фантастычнай кульмінацыяй падзеі.
«У «Паэтычнай кантаце» можна пачуць жывое дыханне паэзіі і тое, як яе пачулі кампазітары», — адзначалася ў анатацыі да твора. І гэта сапраўды было так: свае вершы беларускія аўтары на пачатку дэкламавалі пад акампанемент аргану, а потым — іх словы гучалі ў выканнні дзіцячага хора «Мара» Беларускай школы мастацтваў імя М. Равенскага, пакладзеныя на музыку беларускіх кампазітараў, сярод якіх — Канстанцін Яськоў. Дырыжор хору — Дар’я Дзятко.
Слухач атрымаў сапраўды ўнікальную магчымасць — пачуць веліч арыгіналу — вершаванага твора, і веліч музыкі, музычнага прачытання, калі паэзія і музыка злучаюцца ў асобны твор, які працінае да слёз. «Паэтычная кантата» прысвечана ўсім, хто заходзіцца ў выгнанні і зняволенні, хто спадзяецца і верыць, хто згубіўся і страціў сілы, хто кахае і чакае любові. Яна для ўсіх тых, «хто былі ўчора вадой, а сёння — ужо віно».
Падпісвайцеся на культурныя навіны Reform.news у Telegram