Помнік Ларысе Геніюш у Зэльве. Фота: nebovkletku
Праўладная актывістка Вольга Бондарава атрымала ад мясцовых уладаў адказ на сваё патрабаванне знесці помнік Ларысе Геніюш у Зэльве, паведамляе тэлеграм-канал «Права маюць».
На момант устаноўкі помніка парадак устаноўкі твораў манументальнага мастацтва рэгламентаваўся палажэннем, зацверджаным пастановай Савета Міністраў Рэспублікі Беларусь ад 06.09.2000 № 1393.
Згодна з пунктам 4, мемарыяльныя ансамблі ствараюцца на падставе рашэння Савета Міністраў Рэспублікі Беларусь. Дакументаў, якія пацвярджаюць законнасць помніка Ларысе Геніюш, не прадстаўленыя.
Аднак цяпер парадак устаноўкі помнікаў вызначаны Палажэннем ад 19 верасня 2008 года №1372, у якім норма, якая рэгламентуе дэмантаж самавольна устаноўленых твораў мастацтва, адсутнічае.
Гэта значыць, помнік усталяваны незаконна, але яго знос таксама будзе незаконным.
Нагадаем сутнасць справы… Прапагандыстка Вольга Бондарава напісала ліст главе Адміністрацыі Прэзідэнта Рэспублікі Беларусь Ігару Сергіенку наконт зносу помніка, які быў усталяваны на тэрыторыі царквы Святой Жываначальнай Тройцы яшчэ ў 2003 годзе. Паборніца «рускага свету» высветліла, што бюст беларускай паэтцы (якая, па меркаванні Бондаравай, з’яўляецца «поcобницей нацистских оккупантов»), быў устаноўлены дваццаць гадоў таму на тэрыторыі царквы Святой Жываначальнай Тройцы без дазволу мясцовых удадаў — адміністрацыі горада. Праўладная актывістка накіравала зварот на імя Мітрапаліта Мінскага і Заслаўскага Веніяміна з просьбай даць згоду Праваслаўнай Царквы на ліквідацыю помніка Ларысе Геніюш.