Фота: Віалета Саўчыц.
Беларуская арт-крытыца і даследчыца Таня Арцімовіч стала лаўрэаткай міжнароднага гранта прэстыжнай Прэміі імя Ігара Забеля (Igor Zabel Award Grant) за 2026 год. Гэтая ўзнагарода раз на два гады прысуджаецца выбітным куратарам, гісторыкам мастацтва і тэарэтыкам Сярэдняй, Усходняй і Паўднёва-Усходняй Еўропы.
Міжнароднае журы сёлета высока ацаніла шматгадовую працу Тані Арцімовіч, адзначыўшы яе важкі ўнёсак у даследаванне сучаснага беларускага мастацтва, перформансу, а таксама гісторыі айчыннага авангарду як у самой Беларусі, так і ў асяроддзі беларускай дыяспары.
Эксперты асабліва падкрэслілі каштоўнасць яе навуковых пошукаў, прысвечаных развіццю незалежнага беларускага мастацтва ў перыяды сацыякультурных трансфармацый, з факусаваннем на пытаннях інстытуцыянальных структур, гендара і калектыўнай памяці.
Таня Арцімовіч — вядомая беларуская даследчыца мастацтва, куратарка, рэжысёрка і арт-крытыца. Скончыла Беларускую дзяржаўную акадэмію мастацтваў (тэатральны факультэт) і магістратуру ЕГУ па спецыяльнасці «Візуальныя і культурныя даследаванні». З’яўляецца сузаснавальніцай платформы «pARTisan». Аўтарка міжнароднай манаграфіі «“We are Like the Foremothers”: Traces of the Avant-gardes in Soviet Belarus» (2023) і сурэдактарка акадэмічных зборнікаў па тэме гендара і міграцыі. Доўгі час працавала як рэдактарка знакавых кніг па гісторыі беларускай культуры (у тым ліку даследавання «Беларускі тэатр 1920-30-х: адабраная памяць»), актыўна публікуецца ў міжнародных навуковых выданнях.
Адзначэнне Тані Арцімовіч — гэта чарговы поспех беларускай экспертнай супольнасці на высокім міжнародным узроўні. Нагадаем, што раней, у 2022 годзе, лаўрэаткай Прэміі імя Ігара Забеля станавілася беларуская куратарка Антаніна Сцебур — за сваю куратарскую працу і даследаванні беларускага сучаснага мастацтва.
Галоўную прэмію (Laureate) сёлета атрымала Наталля Іванова — куратарка і дырэктарка-заснавальніца Цэнтра Сучаснага Мастацтва «YermilovCentre» у Харкаве. Журы адзначыла яе працу па захаванні культурнага дыялогу і падтрымцы мясцовай супольнасці ва ўмовах блізкасці да лініі фронту, дзе арт-цэнтр адначасова выконвае ролю галерэі і бяспечнай прасторы.
Іншыя гранты разам з Таняй Арцімовіч атрымалі куратар Октавіян Эшану (Бейрут/Токіа) за даследаванне сувязей паміж посткаланіяльным Блізкім Усходам і постсацыялістычнай Усходняй Еўропай, а таксама куратарка Алена Каравай (Украіна) за стварэнне ўстойлівых рэгіянальных мастацкіх ініцыятыў падчас крызісу.
Прэмія імя Ігара Забеля была заснавана ў 2008 годзе і ўручаецца ў супрацоўніцтве з фондам ERSTE Foundation (Вена) і Асацыяцыяй Ігара Забеля (Любляна). Яна накіравана на тое, каб падкрэсліць глабальную значнасць культурных працэсаў у рэгіёне Цэнтральнай і Усходняй Еўропы.
Урачыстая цырымонія ўзнагароджання лаўрэатаў гэтага года і суправаджальная культурная праграма адбудуцца ў Музеі сучаснага мастацтва ў Любляне (Славенія) 27 лістапада 2026 года.
Падпісвайцеся на культурныя навіны Reform.news у Telegram