Польскія вайскоўцы выявілі ў Балтыйскім моры расійскі беспілотнік. Ён быў падняты і дастаўлены на сушу. Пра гэта паведаміў міністр абароны Польшчы Уладзіслаў Касіняк-Камыш.
“Паблізу пляжа ў Русінаве, недалёка ад Яраслаўца, вайскоўцы выявілі і паднялі з вады Балтыйскага мора беспілотнік. Першапачатковы агляд паказаў, што гэта ваенны беспілотнік расійскага паходжання”, – гаворыцца ў паведамленні.
Паводле яго слоў, на месцы здарэння працуюць адпаведныя службы.
Месца выяўлення беспілотніка знаходзіцца ў Заходне-Паморскім ваяводстве досыць далёка ад мяжы Польшчы з РФ. Паводле інфармацыі СМІ, беспілотнік быў заўважаны вайскоўцамі ВМС, якія знаходзіліся на маторнай лодцы. Яны вылавілі дрон і выцягнулі яго на бераг.
Трэба адзначыць, што ў нядзелю праз Літву меркавана праляцеў беспілотнік. Ён прыляцеў з боку Беларусі і пакінуў паветраную прастору праз мяжу з Калінінградскай вобласцю. Аб’ект быў зафіксаваны радарамі. Таксама паступілі паведамленні ад мясцовых жыхароў пра аб’ект, які ляцеў.