Расіянін Арцём Макараў стаў мастацкім кіраўніком Нацыянальнага Вялікага тэатра оперы і балета Беларусі, паведамляюць у тэлеграм-канале тэатра. Раней ён служыў на пасадзе галоўнага дырыжора.
Яго прызначэнне сведчыць пра сумную тэндэнцыю займання пасадаў у беларускіх культурных установах расійскімі адмыслоўцамі.
Арцём Макараў нарадзіўся ў расійскім горадзе Уфа ў 1977 годзе. У 2000 годзе з адзнакай скончыў Уфімскі Дзяржаўны Інстытут мастацтваў па спецыяльнасці «фартэпіяна», у 2003 — аспірантуру Уфімскага Дзяржаўнага інстытута мастацтваў па спецыяльнасці «оперна-сімфанічнае дырыжыраванне».
У 2010-2023 гадах быў галоўным дырыжорам Башкірскага дзяржаўнага тэатра оперы і балета. З 2013 па 2015 год сумяшчаў дзейнасць у тэатры з працай музычным кіраўніком дзяржаўнай оперы Анталіі (Турцыя).
У 2021 годзе яму прысвоена званне «Народны артыст Рэспублікі Башкартастан».
З 2023 года з’яўляецца галоўным дырыжорам Маскоўскага дзіцячага музычнага тэатра імя Наталлі Сац у Маскве, з таго ж года служыў галоўным дырыжорам тэатра Беларусі.
Нагадаем, што генеральным дырэктарам Нацыянальнага акадэмічнага Вялікага тэатра оперы і балета з‘яўляецца Кацярына Дулава, якая ў 2024 годзе была ўзнагароджана медалём Пушкіна за вялікі ўклад у збліжэнне і ўзаемаўзбагачэнне культур народаў Расіі і Беларусі.
Падпісвайцеся на культурныя навіны Reform.news у Telegram