На пачатку лістапада на канале Malanka Action адбудзецца прэм’ера другога сезону папулярнага беларускага рэаліці-шоу «Kanaplev+Leidik: Без рэтушы». Праект, у якім дуэт фатографаў Яўген Канаплёў і Юлія Лейдзік паказвае працэс стварэння аўтарскіх фотапартрэтаў вядомых постацей беларускай культуры, палітыкі, спорту, у новых эпізодах значна пашырыў сваю геаграфію здымак.
Пра гэта Reform.news паведаміў рэжысёр, прадзюсар праекта Аляксанр Гарадко на Другім з’ездзе беларускіх незалежных кінематаграфістаў, які зараз ідзе ў Нямеччыне. Як зазначыў творца, у новым сезоне аўтары шоу пастараліся захаваць знойдзеную канцэпцыю праекта.
— У першым сезоне мы не разумелі правілы гульні, самі іх прыдумывалі, дастаткова шмат было хаоса, — прызнаецца Аляксандр. — А потым хаос стаў галоўнай фішкай шоу. Таму ў другім сезоне нам не хацелася б згубіць нашу лёгкасць і панкавасць, і не стаць надта структурнымі і правільнымі.
Як падзяліўся рэжысёр, новыя эпізоды каманда атрымала магчымасць здымаць у розных краінах. Будуць героі для сустрэчы з якімі Юлія Лейдзік і Яўген Канаплёў адправяцца ў Гішпанію, Вялікабрытанію, Нарвегію, Латвію…
Акрамя таго, стваральнікі папрацавалі над тым, каб зрабіць шоу больш эстэтычна прывабным.
— Працавалі на тое, каб зрабіць другі сезон больш візуальна прыгожым, — дадае аўтар. — Мы заводзілі нашых герояў падчас гутарак у атмасферныя месцы — у пустыню, лес, каб раскрыць іх у новым атачэнні.
На пытанне, ці зменіцца роля фатографаў Яўгена Канаплёва і Юліі Лейдзік у новым шоу, Аляксандр Гарадко адказаў, што вельмі цэніць знойдзены фармат і не збіраецца яго перазапускаць.
— Аўтары працягнуць быць сабой у праекце. Яны будуць рыхтавацца да сустрэчы з героем, задаваць пытанні, якія прыйшлі ў галаву падчас непасрэднага дыялогу, будуць нараджаць канцэпцыю здымак партрэта. Яны працягнуць захоўваць сваю жвавасць і непасрэднасць. Я бы сказаў, што за гэты час яны сталі прафесіяналамі ў тым, каб не абмяжоўваць сабе пэўнымі рамкамі.
Усяго ў другі сезоне «Kanaplev+Leidik: Без рэтушы» будзе шэсць выпускаў.
— Лічу, што за мінулыя выпускі мы намацалі пэўны нерв, і зараз наша задача сканцэнтравацца на ўмовах, на тым, каб зрабіць крыху лепш і глыбей, а не перапрыдумаваць штосьці. Знойдзены фармат ужо можна быць доўгаіграючым — ён можа працаваць гадамі, бо ў яго рамках ўсё роўна ў кожным новым эпізодзе паўстае ўнікальная гісторыя, — падсумаваў рэжысёр і прадзюсар.
«Kanaplev+Leidik: Без рэтушы» — YouTube-праект, які пачаў выходзіць на канале Malanka Media на пачатку 2024 года. У рэаліці-шоу беларускія фатографы Яўген Канаплёў і Юлія Лейдзік не проста раскрываюць адметнасці сваёй «кухні» фатографаў, але праз фатаграфію ствараюць свой вобраз вядомых беларускіх асобаў. У мінулым сезоне героямі выпускаў «Без рэтушы» сталі: Святлана Ціханоўская, Зоя Белахвосцік, Сяргей Доўгушаў, Сяргей Пукст, Марыя Колесава-Гудзіліна, Анастасія Рыдлеўская, Вольга Сафронава і іншыя постаці.
Фатаграфіі Яўгена Канаплёва і Юліі Лейдзік беларусы маглі бачыць у «мірным жыцці» ў часопісах «Большой», «Таймер», Fashion Collection, Yoga+Life, – у 2014 годзе працы аўтараў былі адзначаны ў намінацыі «Пастановачны партрэт» на «Прэс-фота Беларусі». Дуэт ствараў фотасесіі для музычных гуртоў Molchat Doma і Brutto, актыўна працаваў у рэкламнай фатаграфіі. У 2020 годзе Kanaplev + Leidik сталі аўтарамі вядомага фотаздымку Святланы Ціханоўскай, фотасерыі з Віктарам Бабарыкам.
BarCamp незалежных беларускіх кінематаграфістаў — унікальная антыканферэнцыя, якая збірае за мяжой фільммейкераў розных узроўняў і спецыялізацый з усяго свету ўжо ў другі раз. Нефармальная падзея, з’езд, які сёлета ладзіцца ў Германіі з 7 па 10 кастрычніка намаганнямі Беларускай сеткі кінематаграфістаў BFN (Belarusian Filmmakers’ Network), сабрала больш пяцідзесяці беларускіх фільммейкераў з больш як дзесяці краінаў свету.
Падпісвайцеся на культурныя навіны Reform.news у Telegram
Если вы нашли ошибку, пожалуйста, выделите фрагмент текста и нажмите Ctrl+Enter.
