Уладальнікам Гран-пры «Трыумф» Нацыянальнага конкурсу «Мастацтва кнігі» быў аб’яўлены «Нацыянальны атлас Беларусі», комплекснае выданне, якое стваралася з 2022 года. Цырымонія ўзнагароджання прэміі сёння адбылася на Міжнароднай кніжнай выставе-кірмашы ў Мінску. Аднак сярод дыпламантаў як быццам прэстыжнага спаборніцтва апынулася і кніга «Донбасс — Новороссия: белорусский взгляд» аўтарства Вадзіма Гігіна, Грыгорыя Азаронка, Ксеніі Лебедзевай і Сяргея Лушчы.
Кніга, якая «расказвае пра падзеі ў ДНР і ЛНР вачыма нашых журналістаў і грамадскіх дзеячаў, якія там працавалі», была адзначана дыпломам I ступені ў намінацыі «Сіла ў праўдзе і адзінстве». Адзначым, што гэта не галоўная ўзнагарода: пераможцай у гэтай катэгорыі была названа выданне «Суперпазіцыя. Паралельныя светы» праўладнага палітолага Сяргей Мусіенкі, выдадзенае БелТА.
Лаўрэаты ў іншых намінацыях выглядаюць так:
- У катэгорыі «У люстэрку часу» пераможцамі сталі: выдавецкі дом «Звязда» за кнігу «Совет Безопасности Республики Беларусь. 30 лет в одной команде» і выдавецтва «Чатыры чвэрці» за выданне «Навечно в памяти народов. Герои Советского Союза — уроженцы союзных республик, получившие высокое звание за освобождение Беларуси от немецко-фашистских захватчиков».
- За «Любимые сказки наших прабабушек» у намінацыі «ЛІТ-формат» было адзначана выдавецтва «Мастацкая літаратура».
- Пераможцай намінацыі «Арт-кніга» было прызнана выданне «Штрихи говорят: альбом графических работ» Аляксандра Лакотка (выдавецкі дом «Белорусская наука»).
- Кніга «Национальное достояние Беларуси» ад выдавецтва «Адукацыя і выхаванне» была вылучана ў катэгорыі «За ўнёсак у захаванне гісторыка-культурнай спадчыны».
- Фотаальбом «Беларусь. Зямля пад белымі крыламі» беларускага фатографа Анатоля Кляшчука ўзяла першынства ў намінацыі «Фотапогляд».
- Два пераможцы вызначыліся ў катэгорыі «Дзецям XXI стагоддзя» — «Як мядзведзікі тату згубілі» Віктара Гардзея (выдавецтва «Мастацкая літаратура») і «Глобус, или путешествие Тима в Индию» Ірыны Токаравай (выдавецтва «Адукацыя і выхаванне»).
- У намінацыі «Сучасны вучэбнік» было зноў адзначана выдавецтва «Адукацыя і выхаванне» за кнігу «Буквар».
- Не абышлося без намінацыі «Духоўнасць», дзе пераможцам стала выдавецтва «Беларусь» за кнігу «Символы суверенной Беларуси» аўтарства таго ж самага Сяргея Мусіенкі.
- У намінацыі «Садружнасць» выйграў праект Саюзнай дзяржавы «От Москвы до Бреста. По дороге славы» (выдавецтва «Форум»).
- Выдавецтва «Беларусь» таксама атрымала «Залаты фаліянт» за кнігі «Партызаны Беларусі. Партизаны Беларуси. Partisans of Belarus»» і «Геноцид белорусского народа. Карательные операции. Части 1, 2» у намінацыі «Беларусь памятае».
Адзначаецца, што сёлета на 64-ты Нацыянальны конкурс «Мастацтва кнігі» паступіла вялізная колькасць заявак — каля 10 тысяч выданняў. Арганізатарам конкурсу з’яўляецца Міністэрства інфармацыі Беларусі.
Падпісвайцеся на культурныя навіны Reform.news у Telegram
