Dranik-bus. Фота: t.me/radiosvaboda
На фестывалі Burning Man запрацаваў беларускі лагер. «MARA, — апісваецца лагер на афіцыйным сайце фестывалю, — запрашае вас пазнаёміцца са старажытнымі беларускімі магічнымі практыкамі і традыцыямі, якія спрыяюць рытуальнаму ачышчэнню і натхняюць на новыя пачынанні».
Што гэта за магічныя практыкі? Беларусы прапануюць папарыцца ў традыцыйнай лазні, пакаштаваць травяной гарбаты і пачаставацца дранікамі. Для гэтага падрыхтавалі намёты з прынтамі ў стылі выцінанкі і адмысловы аўтобус — Dranik-bus.
Лазню прывезлі з Варшавы — гэта вялікі намёт, унутры якога размяшчаецца печ, а венікі для лазні — з Украіны.
Mara Camp з‘явіўся дзякуючы агенцыі Vondel Digital, заснаванай былым палітвязнем Аляксандрам Васілевічам.
Беларусы не першы раз удзельнічаюць у Burning Man, але ўласны лагер у пустыні Блэк Рок паўстаў у першы раз.
Фестываль Burning Мan у ЗША праходзіць штогод. Насамрэч арганізатары называюць імпрэзу не фестывалем, а эксперыментам, у выніку якога ў пустэльні з’яўляецца своеасаблівы горад, у якім амаль усё, што адбываецца, цалкам ствараецца яго жыхарамі. У пустыні ўсталёўваюцца творы сучаснага мастацтва, часта фантастычных формаў. Некаторыя з іх спальваюцца стваральнікамі да заканчэння фэсту.
Кульмінацыяй фэстывалю з‘яўляецца спальванне вялізнай скульптуры чалавека ў цэнтры лагеру.
Падпісвайцеся на культурныя навіны Reform.news у Telegram