Лідарства неангламоўнага фільма і намінацыя для расійскага актора: чым здзіўляе «Оскар-2025»

Амерыканская акадэмія кінематаграфічных навук і мастацтваў абвясціла намінантаў на 97-ю прэмію «Оскар». Сёлета не абышлося без сюрпрызаў.

Лідарам стаў мюзікл Жака Ад’яра «Эмілія Перэс», вылучаны на ўзнагароды ў 13 катэгорыях, уключаючы «Найлепшы фільм» і «Найлепшы фільм на замежнай мове». Гэта з’яўляецца рэкордам для неангламоўнага фільма.

Французскі незалежны фільм «Эмілія Перэс» быў зняты класікам французскага кінематографа Жакам Ад’ярам на іспанскай мове, ён распавядае пра мексіканскі наркакартэль. Фільм спалучае ў сабе элементы камедыі і драмы. Сюжэт разгортваецца вакол маладой жанчыны, якая вымушана змагацца за сваё месца ў свеце, поўным сацыяльных і палітычных выклікаў. Рыта — адвакатка, якая адчувае сябе на працы не ў сваёй талерцы. Яе кампанія любіць вялікія грошы, таму часта дапамагае злачынцам сысці ад адказнасці. Але аднойчы гераіня атрымлівае нечаканую прапанову. Яна павінна дапамагчы лідару наркакартэля сысці з крымінальнага свету і рэалізаваць неверагодны план уцёкаў: стаць жанчынай.

Украінскі фільм другі год запар трапіў у спіс намінантаў. Гэтым разам за статуэтку «Оскара» будзе змагацца дакументальны фільм Славы Лявонцьева і Брэндана Белломо «Парцалянаваная вайна». Стужка распавядае пра жыццё мастакоў-керамістаў у Харкаве ў пачатку вялікага расійскага ўварвання 2022 года. «Сярод хаосу і разбурэнняў жорсткага расійскага ўварвання ва Украіну трое мастакоў адчайна знаходзяць натхненне і прыгажосць, абараняючы сваю культуру і сваю краіну», — пішуць пра стужку яе аўтары.

Анімацыйны фільм латвійска-французскай вытворчасці латышскага рэжысёра Гінтса Зілбалодзіса «Плынь» (Flow) адзначаны адразу ў дзвюх катэгорыях: «Найлепшы анімацыйны фільм» і «Найлепшы міжнародны фільм». Фільм расказвае гісторыю ката, чый самотны лад жыцця змяняецца, калі яго дом разбурае моцная паводка. Каб выжыць, кот павінен навучыцца пераадольваць страх перад вадой і ладзіць з рознымі жывёламі. Фільм заваяваў шэраг прызоў, у тым ліку «Еўрапейскую кінапрэмію» і «Залаты глобус».

У акцёрскіх катэгорыях не абышлося без сюрпрызаў. У намінацыях адсутнічаюць такія вядомыя акторкі, як Ніколь Кідман і Анджэліна Джолі, якія не атрымалі намінацый за ролі ў фільмах «Добрая дрэнная дзяўчынка» і «Марыя» адпаведна. Гэта стала нечаканасцю для многіх гледачоў і крытыкаў.

Упершыню вылучылі на «Оскар» Дэмі Мур. Актрыса намінаваная ў катэгорыі «Найлепшая жаночая роля» за працу ў фільме «Субстанцыя».

Карла Сафія Гаскон стала першай адкрытай трансгендарнай актрысай, намінаванай на «Оскар» за ролю ў фільме «Эмілія Перэс». Яе персанаж уяўляе сабой новы погляд на пытанні ідэнтычнасці і самавыяўлення ў сучасным грамадстве.

Юрый Барысаў, які прэтэндуе на ўзнагароду ў катэгорыі «Найлепшы актор другога плану» за ролю ў «Аноры» Шона Бэйкера, стаў першым расійскім акторам, намінаваным на «Оскар» за ўсю гісторыю прэміі. Барысаў сыграў ролю «вышыбалы» Ігара.

Украінскія гледачы заўважылі, што гэты акцёр у свой час іграў у расійскім прапагандысцкім фільме «АК-47», які здымаўся ў тым ліку ў часова акупаваным Крыме.

Раней Барысаў быў намінаваны ў аналагічнай катэгорыі на прэмію «Залаты глобус», але ўзнагароду атрымаў амерыканскі акцёр Кіран Калкін за працу ў фільме «Сапраўдны боль».

У Расіі разгарэлася дыскусія, ці варта разглядаць намінацыю актора на «Оскар» як завяршэнне «адмены» расійскай культуры на Захадзе, у яе ўмяшаўся прэс-сакратар прэзідэнта Расіі Дзмітрый Пяскоў і адказаў на гэтае пытанне адмоўна.

Дарэчы, Барысаў здымаўся ў стужцы «Крышталь» Дар’і Жук, сыграўшы там Аліка — бойфрэнда-наркамана галоўнай гераіні.

Уручэнне ўзнагарод 97-й прэміі «Оскар» адбудзецца ў Лос-Анджэлесе 2 сакавіка. З поўным спісам намінантаў можна азнаёміцца тут.

Падпісвайцеся на культурныя навіны Reform.news у Telegram