12 верасня ў Сопаце пройдзе фестываль музыкі MARA FEST — магчыма, апошні шанец «качнуць» сыходзячае лета. Фэст, які ў сваіх памкненнях злучае вольнасць, музыку і супольнае быццё, гэтым разам падрыхтаваў кароткі, але моцны лайн-ап: нямецкі музыка Christian Löffler, варшаўскі дуэт Rysy і аўтары нашумелага «Аўгуста» — беларускі гурт Intelligency.
Год за годам асноўнай адметнасцю MARA FEST застаецца яго музычная канцэпцыя: арганізатары прынцыпова робяць акцэнт на моцным міжнародным складніку, спалучаючы топ-выканаўцаў еўрапейскай электроннай сцэны з яскравымі беларускімі зоркамі. Заснаваны Таварыствам беларусаў на Памор’і пры падтрымцы мэрыі Сопата, праект за некалькі гадоў прайшоў шлях ад акцыі ў Леснай Оперы да вытанчанага міжкультурнага моста, які аднолькава прыцягвае як дыяспару, так і мясцовую польскую ды еўрапейскую публіку.
Сёлета фестываль вяртаецца на ўжо абжытую пляцоўку «Tarasy przy Aquaparku» акурат на беразе Балтыйскага мора. Арганізатары робяць стаўку на заспакаяльны фармат «slow-life»: замест мітусні паміж рознымі сцэнамі госці атрымаюць адзіную атмасферную прастору.
Што вядома пра артыстаў сёлетняй імпрэзы?
Christian Löffler з Нямеччыны — адзін з галоўных візіянераў сусветнай эмбіент-тэхна сцэны. Музыкант вядомы сваімі касмічнымі live-сэтамі на найбуйнейшых фестывалях планеты (адMayan Warrior на Burning Man да акустычных канцэртных залаў). Яго гіпнатычны, меланхалічны гук ідэальна трапляе ў вайб вераснёвага мора.
Rysy DJ set з Польшчы — варшаўскі дуэт Войцэха Урбаньскага і Лукаша Стахурка — лаўрэаты галоўнай польскай музычнай прэміі Fryderyk у намінацыі «Электронная музыка». Хлопцы спалучаюць прагрэсіўныя танцавальныя рытмы з глыбокімі мелодыямі і збіраюць аншлагі па ўсёй Польшчы.
Ды Intelligency з Беларусі — інды-электронны феномен, чый трэк «August» у сваім часе ўзарваў міжнародныя чарты. Гурт прынясе на фэст сваю фірмовую шчыльную энергетыку і пазнавальны вайб.
Акрамя музычнай праграмы, на пляцоўцы звычайна прадугледжаны арт-зоны і сямейныя лакацыі, а для дзяцей да 12 гадоў уваход зрабілі бясплатным.
Набыць квіткі на імпрэзу можна тут.
Падпісвайцеся на культурныя навіны Reform.news у Telegram
