Культурная прастора MIT на варшаўскай Празе апынулася на мяжы закрыцця. У сувязі з сусветнымі зменамі пляцоўка згубіла крыніцу суфінансавання і зараз звяртаецца па дапамогу да сваіх наведвальнікаў.
Культурна-адукацыйная прастора МІТ была адкрытая ў мінулым годзе дзвюма беларускамі на прыватныя інвестыцыі адной са сузаснавальніц — Таццяны Макарэвіч.
«Выбар незалежнай формы існавання быў свядомым, і ўжо амаль год праект на 80% акупляе сябе сам. За гэты час мы правялі 70+ мерапрыемстваў, прынялі 1200+ гасцей, а 50+ культурных дзеячаў (большай часткай эмігрантаў з Беларусі) атрымалі магчымасць зарабіць, займаючыся прафесійнай дзейнасцю. MIT стаў яркім і важным пунктам прыцягнення беларусаў Варшавы (і не толькі!)», — распавядае пра свае дасягненні каманда прасторы.
На жаль, выбары ў Амерыцы паўплывалі на фінансавае становішча Таццяны Макарэвіч, і яна больш не здолее фінансава падтрымліваць пляцоўку.
«Але я і ўся наша каманда вельмі спадзяемся, што здолеем захаваць наш праект і далей прымаць вас у нас у гасцях. Таму мы і просім вашай дапамогі, каб захаваць МІТ», — звяртаецца да супольнасці сузаснавальніца ў сваіх сацсетках.
Каманда прапаноўвае некалькі опцый, якім чынам можна дапамагчы праекту.
Па-першае, прыходзіць на мерапрыемствы. Купляць квіткі праз меседжар, дырэкт Інстаграм пляцоўкі ці па спасылках, указаных у анонсах мерапрыемства.
Па-другое, арандаваць MIT для прыватнай сустрэчы ці пастаянных заняткаў.
Па-трэцяе, распавесці пра праект.
Па-чацвёртае, зрабіць разавы плацёж на сэрвісе BuyMeaCoffee.
Прапаноўваюцца разнастайныя варыянты разавай і пастаяннай падтрымкі — азнаёміцца з імі можна тут.
Дазнацца пра расклад мерапрыемстваў на люты ў MIT — тут.
Падпісвайцеся на культурныя навіны Reform.news у Telegram