Крэйдавыя кар’еры ў Ваўкавыскім раёне прызнаныя геалагічным помнікам прыроды мясцовага значэння, афіцыйная назва помніка — «Краснасельскія Мальдзівы». Такое рашэнне мясцовага райвыканкама было апублікавана 12 мая на Нацыянальным прававым інтэрнэт-партале.
Дакументам устаноўлены межы помніка прыроды, яго плошча — 356,83 га, землекарыстальнікі, зямельныя ўчасткі, часткі зямельных участкаў якіх уключаны ў склад зямель помніка прыроды — ААТ «Краснасельскбудматэрыялы» (301,01 га), Ваўкавыскі лясгас, камунальнае сельскагаспадарчае ўнітарнае прадпрыемства «Няверавічы», а таксама рэжым аховы і выкарыстання.
Вызначана, што кіраванне помнікам прыроды ажыццяўляецца Ваўкавыскім раённым турыстычным інфармацыйным цэнтрам, ААТ «Краснасельскбудматэрыялы».
Рашэнне ўступае ў сілу пасля яго афіцыйнага апублікавання.
Галоўная задача прыняцця такога рашэння — захаваць крэйдавыя кар’еры для наступнага навуковага вывучэння. Навукоўцы, біёлагі, батанікі, заолагі даследуюць, як адбываецца змена адной біялагічнай супольнасці іншым у выніку ўздзеяння чалавека.
Другая прычына — турыстычная. Калі кар’еры будуць помнікам прыроды, гэта дасць магчымасць умерана выкарыстоўваць гэтыя тэрыторыі як для экалагічнага, так для іншых відаў турызму.
Месца вядомае сваімі незвычайнымі краявідамі. Цяпер тут забаронены развядзенне агню, размяшчэнне намётаў па-за спецыяльнымі месцамі, пашкоджанне раслін і глебы, стаянка машын. Купацца ў кар’ерах небяспечна.
Падпісвайцеся на культурныя навіны Reform.news у Telegram
