Ганаровая ўзнагарода Прэзідэнта і Савета Еўрапейскай кінаакадэміі будзе ўручана венгерскаму рэжысёру Бэлу Тару

З нагоды 36-й цырымоніі ўручэння Еўрапейскай кінапрэміі 9 снежня легендарнаму рэжысёру Бэлу Тару будзе ўручана Ганаровая ўзнагарода прэзідэнта і праўлення Акадэміі. Гэтай узнагародай Еўрапейская кінаакадэмія жадае аддаць асаблівую даніну павагі выбітнаму аўтару і асобе з моцным палітычным голасам, якога не толькі глыбока паважаюць яго калегі, але і адзначаюць гледачы ва ўсім свеце. Бэла Тар стаў шостым кінарэжысёрам, які атрымаў гэтае прызнанне — раней лаўрэатамі былі Маноэль дэ Алівейра, Мішэль Піколі, сэр Майкл Кейн, Анджэй Вайда і Коста-Гаўрас.

Адным з самых вядомых фільмаў Тара з’яўляецца SÁTÁNTANGÓ, 450-хвілінная экранізацыя рамана Ласла Краснагоркаі, паказаная ў секцыі форуму Берлінале ў 1994 годзе, дзе яна атрымала прэмію Калігары. Фільм таксама атрымаў Гран-пры журы на Тыдні венгерскага кіно ў Будапешце і хутка дасягнуў статусу культавага, яго часта называюць адным з самых важных фільмаў 1990-х.

Яго поўнаметражны фільм 2011 года «ТУРЫНСКІ КОНЬ» атрымаў Гран-пры журы «Сярэбраны мядзведзь» і ўзнагароду ФІПРЭСІ ў Берліне і быў намінаваны на Еўрапейскую кінапрэмію.

Цырымонія ўручэння Еўрапейскай кінапрэміі – самай вядомай і прэстыжнай узнагароды еўрапейскага кіно – адбудзецца 9 снежня. Нагадаем, што на найлепшы дакументальны фільм у конкурсе Прэміі вылучана стужка беларускіх рэжысёраў Ганны Бадзяка і Аляксандра Міхалковіча “Радзіма”.