Галоўным дырыжорам Вялікага тэатра Беларусі стаў расійскі музыкант

Народны артыст Рэспублікі Башкартастан Арцём Макараў стаў галоўным дырыжорам Вялікага тэатра Беларусі. Аб новым прызначэнні паведаміла на агульным сходзе тэатра генеральны дырэктар установы Кацярына Дулава.

«Трупа ў добрым стане, і ўвогуле ў гэтым тэатры магчымыя, на мой погляд, любыя прадстаўленні, нават самыя складаныя і экстрэмальныя. Спадзяюся, мне калі-небудзь удасца ўвасобіць тут і свае мары», — сказаў Макараў.

Арцёма Макарава беларускі тэатр запрасіў на сталае супрацоўніцтва на пачатку года. За гэты час расійскі музыкант дырыжыраваў операмі «Багема» і «Пікавая дама», спектаклямі «Турандот», «Самсон і Даліла», «Аіда».

Адметна, што ў жніўні ён таксама быў прызначаны на пасаду галоўнага дырыжора расійскага Тэатра імя Наталлі Сац.

Нагадаем, што з Вялікага тэатра Беларусі пачынаючы з 2020 года былі «звольненыя» чатыры беларускія дырыжоры: Вячаслаў Чарнуха-Воліч, Андрэй Галанаў, Іван Касцяхін, Алег Лясун. Іх імёны прыбраныя на сайце тэатра з гісторыі спектакляў, над стварэннем якіх яны працавалі. Тэатр усё больш прымае ў свой штат адмыслоўцаў з Расіі.