Беларускія кінематаграфісты прадставяць на Еўрапейскім кінарынку Берлінале свае кінапраекты

Падчас пітчынгу беларускіх кінапраектаў у межах Еўрапейскага кінарынку на Берлінале ў 2024 годзе. Фота: Наталля Вавілонская.

15 лютага на Еўрапейскім рынку Берлінскага міжнароднага кінафестывалю адбудзецца пітчынг праектаў беларускіх кінематаграфістаў. Ужо другі раз адмысловую сустрэчу беларускіх аўтараў з міжнароднай супольнасцю ладзіць Беларуская незалежная кінаакадэмія. Падзея адбудзецца ў галоўным будынку Еўрапейскага кінарынку – Martin Gropius Bau.

Пітчынг (ад слова pitch — прасоўваць, выстаўляць пра продаж) — вусная або візуальная прэзентацыя кінапраекта з мэтай знаходжання інвестараў.

На Еўрапейскім кінарынку (EFM) будуць прадстаўлены дзесяць праектаў ад беларускіх кінематаграфістаў: дзевяць ігравых праектаў і адзін дакументальны.

Гэта:

«Жнівень» Нэлы Агрэніч (ігравы фільм, драма),
«Краіна ўцех» Аляксандры С. і Міхала Мешчыка (ігравы фільм, заснаваная на рэальных падзеях, драма),
«Лебядзіная песня Фёдара Озерава» Юрыя Сямашкі (ігравы фільм, драмедыя),
«Lithuania Minor» Арцёма Лобача (дакументальны фільм),
«Суд мёртвых» Андрэя Кашперскага і Міхаіла Зуя (ігравы фільм, хорар, камедыя),
«Суперпазіцыя» Марыі Пташкі (ігравы фільм, драма, камедыя, абсурд),
«Tamka 9» Улады Сяньковай (ігравы фільм, драма).

Аўтары яшчэ трох праектаў ігравых фільмаў, адзначае Кінаакадэмія, возьмуць удзел у пітчынгу ананімна для публічнай камунікацыі: гэта праекты «Праўда» (драма, трылер), «Раны і ўпрыгожанні» (фэнтэзі-барока, драма), «Сфагнум» (сюррэалістычная трагікамедыя).

Да публічнай прэзентацыі на Еўрапейскім кінарынку ўдзельнікаў пітчынгу рыхтуюць еўрапейскія эксперты з Фінляндыі і Італіі: рэпетытарка праектаў Documentary Campus, EsoDoc, WEMW і EAVE, экс-кіраўніца фестывалю DOK Leipzig Леэна Пасанэн, а таксама прадзюсар, рэжысёр, эксперт у галіне кіно, рэпетытар на Biennale Cinema College Venice, Amman Film Industry, Attagirl, Cannes Docs і іншых праграмах Стэфана Тэальдзі.

Нагадаем, што першы пітчынг беларускіх праектаў на Еўрапейскім кінарынку, арганізаваны Беларускай незалежнай кінаакадэміяй, адбыўся год таму: паслухаць беларускіх фільммейкераў у Gropius Bau сабралася больш за 70 чалавек. Прысутнічалі беларускія кінематаграфісты, еўрапейскія адмыслоўцы і прадстаўнікі кінаіндустрыі. У межах сустрэчы 2024 года Мара Тамковіч, у прыватнасці, паказала эпізод свайго першага поўнаметражнага фільма «Пад шэрым небам», прэм’ера якога адбылася ў чэрвені на нью-ёркскім фестывалі Tribeca.

У межах будучага EFM працягне таксама працу стэнд Беларускай незалежнай кінаакадэміі.

Берлінскі міжнародны кінафестываль пройдзе з 13 па 23 лютага. Еўрапейскі кінарынак у межах кінаагляду будзе працаваць з 13 па 19 лютага.