Аляксей Палуян падчас TorinoLab. Фота: сацсеткі рэжысёра.
Толькі на гэтым тыдні стала вядома пра фінансаванне маштабнага кінапраекта «Спадчына» беларускага рэжысёра Аляксея Палуяна. Фільм, які падтрымала міністэрства культуры Германіі, будзе распавядаць пра пратэсты 2020 года ў Беларусі. Падобнае на тое, запускам стужкі зацікавіліся правакатары — Аляксей Палуян папярэджвае аб фэйкавых запытах ад імя каманды яго кінапраекта.
Беларусам сталі паступаць паведамленні з запрашэннем прыйсці на кастынг будучага фільма.
«У гэтых паведамленнях ёсць пытанне: «Ці прымалі вы ўдзел у мірных пратэстах 2020 года ў Беларусі?», — распавядае рэжысёр. — Гэтыя паведамленні не маюць ніякага дачынення да маёй каманды, бо кастынг да праекта адбываецца толькі польскім кастынг-дырэктарам і толькі праз праз інтэрнэт-партал для прафесійных акцёраў», — звяртае ўвагу творца.
Нагадаем, што толькі на днях стала вядома пра падтрымку праекта беларускага рэжысёра Федэральным урадам па пытаннях культуры і СМІ Германіі — інстытуцыя вылучыла на вытворчасць карціны «Спадчына» 500 тысяч еўра. Агулам бюджэт ігравога фільма, які ствараеца ў кааперацыі польскіх і нямецкіх партнёраў, больш за 1 мільён еўра.
У фільме падзеі адбываюцца ў пратэсным жніўні 2020 года ў Беларусі. Сям’я ў віхуры падзей павінна вырашыць, ці застаецца яна вернай рэжыму, ці далучаецца да супраціву. У цэнтры апавядання — фатограф Павел, чые бацькі служылі сістэме, і які сам вагаецца паміж канфармізмам і бунтам.
Аўтар стужак «Возера радасці», «Смеласць» Аляксей Палуян працаваў над пошукам фінансавання і развіццём «Спадчыны» больш за пяць гадоў.
Цяпер жа пасля атрымання фінансавай незалежнасці было аб’яўлена аб здымках карціны — яны адбудуцца ўлетку 2026 года ў Польшчы. Гэта навіна, відаць, не прайшла міма правакатараў.
Падпісвайцеся на культурныя навіны Reform.news у Telegram