З 16 па 22 сакавіка Ляйпцыг зноў становіцца галоўнай кніжнай сталіцай Еўропы. Для беларускай культуры гэтая пляцоўка стала асабліва сімвалічнай пасля мінулага года, калі Альгерд Бахарэвіч атрымаў прэстыжную Ляйпцыгскую кніжную прэмію за еўрапейскае паразуменне. Сёлета ўвага да нашых аўтараў застаецца на піку.
Старт інтэлектуальнага тыдня: жаночыя ўтопіі і экзіл-літаратура
Ужо ў панядзелак, 16 сакавіка, у Bibliotop універсітэта Ляйпцыга (Halle 4, E401) пройдзе маштабная прэзентацыя экзіл-літаратуры і кнігі «На шляху да вас» (Auf dem Weg zu euch) з удзелам Тані Арцімовіч, Вольгі Шпарагі і Міланы Лявіцкай.
У гэты ж вечар а 19:30 у Literaturhaus Leipzig Вольга Шпарага выступіць з лекцыяй «Утопія клапатлівай палітыкі для XXI стагоддзя», дзе разбярэ неабходнасць фемінісцкіх утопій у сучасным свеце. Паралельна ў Haus des Buches адбудзецца дыскусія «Таямніца ператварэння» з удзелам Іны Румянцавай, якая закліча еўрапейскага чытача звярнуць позірк на Усходнюю Еўропу.
Калеснікава і Знак у Старой Ратушы
Адной з самых чаканых падзеяй праграмы стане публічнае выступленне Марыі Калеснікавай і Максіма Знака, якія пасля свайго вызвалення ў снежні 2025 года ўпершыню выходзяць на такую маштабную міжнародную пляцоўку. Іх сустрэча пад назвай «Думкі і рэфлексіі пра чытанне і пісьмо ва ўмовах несвабоды» пройдзе 17 сакавіка ў сімвалічным месцы — выставачнай зале Старой Ратушы а 10.00. Весці гэтую гістарычную размову будзе вядомая журналістка нямецкага выдання Die Zeit Аліса Бота, якая даўно і глыбока займаецца беларускай тэматыкай.
Новая проза і паэзія: ад Сашы Філіпенкі да Вольгі Гапеевай
У гэты ж дзень а 19:00 у Нямецкай нацыянальнай бібліятэцы папулярны празаік Саша Філіпенка прэзентуе свой новы раман «Слон» — палітычную прыпавесць, якая ўжо стала прадметам вострых дыскусій у еўрапейскіх літаратурных колах.
Асноўная праграма працягнецца і ў наступныя дні кірмашу.
У чацвер, 19 сакавіка, пройдуць творчыя сустрэчы з Сашам Філіпенкам (а 14:00 і 21:00), а ў пятніцу, 20 сакавіка, а 17:00 адбудзецца размова з паэткай Юляй Цімафеевай.
Завершыцца беларускі тыдзень у суботу, 21 сакавіка: а 13:00 пройдзе вялікая дыскусія пра беларускую літаратуру ў выгнанні, а а 15:00 свае творы прадставіць Вольга Гапеева.
Гэты шчыльны графік імпрэз яшчэ раз падкрэслівае, што менавіта ў Ляйпцыгу сёння б’ецца сэрца сапраўднай беларускай літаратуры, пакуль у афіцыйным Мінску кніжныя кірмашы застаюцца пляцоўкай для ідэалагічных справаздач СНГ.
Падрабязней расклад беларускіх імпрэз можна дазнацца тут.
Падпісвайцеся на культурныя навіны Reform.news у Telegram
