Беларуская школа ў Варшаве працягвае набор на новы навучальны год. Заняткі праходзяць анлайн і афлайн

Reform.news · 25 августа 2026, 09:28

https://reform.news/belaruskaya-shkola-varshave-praczyagvae-nabor-na-novy-navuchalny-god-zanyatki-prahodzyacz-anlajn-i-aflajn/

Адукацыйная пляцоўка — Беларуская школа ў Варшаве — прапануе навучанне дзецям з любой краіны свету і запрашае далучыцца да анлайн і афлайн заняткаў у новым навучальным годзе 2026 — 2027.

У Варшаве беларуская школа працуе па суботах.

У школе арганізуюцца дадатковыя заняткі да адукацыі краіны пражывання па беларускім кампаненце прадметаў: мова і літаратура, чалавек і свет, гісторыя, мастацтва Беларусі, а таксама — выяўленчае мастацтва, спевы, танцы і гульні, батлейка (да пяці гадзін на тыдзень). Для васьмікласнікаў мяркуецца арганізацыя ўрокаў па матэматыцы і польскай мове дзеля падрыхтоўкі да абавязковых экзаменаў у польскай школе.

Праграмы па прадметах звязаны з афіцыйнымі айчыннымі праграмамі, што надае сістэмнасць у навучанні. Навучэнцы ў гэтым выпадку не адстаюць ад сваіх аднагодкаў на радзіме і пры спрыяльных умовах могуць бясстратна працягваць вучобу ў Беларусі.

Міністэрства адукацыі Польшчы штогод дае магчымасць навучацца ў прыдатных кабінетах, прадстаўляючы іх у бясплатную арэнду.

Навучанне праводзіцца па суботах у памяшканні школы № 395 Варшавы (ul. Staffa 21).

Запісаць дзяцей у школу можна па спасылцы.

Падпісвайцеся на культурныя навіны Reform.news у Telegram