Беларуская тэатральная супольнасць у замежжы абвесціла аб стварэнні Беларускага Інстытута тэатра

Беларускае тэатральнае кам’юніці ў замежжы ўчора апублікавала мемарандум аб стварэнні Беларускага Інстытута тэатра (БІТ). Ён быў падпісаны беларускімі тэатральнымі дзеячамі па выніку адмысловай канферэнцыі па стварэнні незалежнай інстытуцыі. Падзея адбылася 7-9 верасня, але зараз інфармацыя і асноўны дакумент — мемарандум — сталі даступныя для кожнага.

У афлайн- і анлайн-канферэнцыі ўзялі ўдзел каля 50 прадстаўнікоў і прадстаўніц беларускай тэатральнай супольнасці: акторы, рэжысёры, крытыкі, тэатразнаўцы, менеджары, тэхнічныя спецыялісты, а таксама журналісты. Сярод іх: Купалаўцы Алег Гарбуз, Валянціна Гарцуева, Зоя Белахвосцік, а таксама рэжысёры Юра Дзівакоў, Уладзімір Ушакоў, прадзюсар Марына Дашук, актор і рэжысёр Андрэй Новік, драматург Андрэй Іваноў, даследчыца тэатра Анастасія Панкратава і многія іншыя.

Па выніку ўдзельнікі і ўдзельніцы канферэнцыі распрацавалі рашэнні для кірункаў працы будучага Інстытута.

У створаным мемарандуме акрэслены асноўныя прынцыпы працы БIТ:

• Поле дзейнасці – усё поле беларускага тэатра: як унутры Беларусі, так і за яе межамі;
• Дэцэнтралізацыя паміж малымі і вялікімі гарадамі і мясцовасцямі;
• Недыскрымінацыя па гендары, узросце і іншых крытэрах;
• Адвакацыя правоў прадстаўнікоў/_ніц прафсупольнасці;
• Забеспячэнне балансу паміж бяспекай і празрыстасцю;
• Развіццё міждысцыплінарнага ўзаемадзеяння.

Асноўныя напрамкі дзейнасці інстытуцыі:

• Праца з прафесійнай супольнасцю беларускага тэатра і сумежных мастацтваў. Адвакацыя правоў адмыслоўцаў беларускага тэатра;
• Развіццё прафесійнай нефармальнай і акадэмічнай адукацыі ў галіне тэатра;
• Стымуляванне і стварэнне ўмоваў для тэатральнай вытворчасці і сумежных праектаў прафесійнай супольнасці;
• Навукова-даследчая дзейнасць у галіне тэатра і тэатральнай (культурнай) палітыкі;
• Камунікацыйная дзейнасць;

Наступны крок беларускага кам’юніці па запуску БІТ — стварэнне працоўных групаў і працэс рэгістрацыі юрыдычнай асобы (уключна юрыдычнае суправаджэнне).

Важнай часткай прынцыпу працы БІТ застаецца гарызантальнасць і адкрытасць. Таму далучыцца да працы Інстытута можа кожны зацікаўлены — дастаткова запоўніць анкету альбо напісаць на пошту Беларускага тэатральнага кам’юніці ці ў сацыяльныя сеткі.

Канферэнцыя па стварэнні Беларускага Інстытута тэатра была арганізавана працоўнай групай Беларускага тэатральнага кам’юніці, куды ўваходзяць Анжаліка Крашэўская, Валянціна Мароз, Паліна Дабравольская, Каця Раманчык і іншыя ўдзельніцы каманды.

Сачыць за дзейнасцю беларускай тэатральнай супольнасці можна тут.