Беларуская Рада Культуры і БАЖ абвясцілі супольную праграму для культурных праектаў і медыя

Беларуская Рада Культуры супольна з Беларускай асацыяцыяй журналістаў у межах ініцыятывы ArtPower Belarus абвясцілі пра запуск навучальна-нетворкавай праграмы «Культура і медыя: нэтворкінг для новых партнёрстваў».

Праект закліканы зблізіць культурніцкія арганізацыі і ініцыятывы з медыя, журналістамі, блогерамі, кантэнт-крыэйтарамі і незалежнымі аўтарамі, каб дапамагчы ім знайсці супольныя тэмы, распрацаваць спецпраекты і навучыцца пітчыць свае ідэі.

Што чакае ўдзельнікаў і ўдзельніц?

Праграма складаецца з двух анлайн-воркшопаў і фінальнай афлайн-сустрэчы ў Варшаве:

1 кастрычніка (17:00–20:00 па Варшаве) | Анлайн-воркшоп:
Як знаходзіць агульныя інтарэсы, ператвараць тэмы ў супольныя праекты і разумець патрэбы адно аднаго.
5 кастрычніка (17:00–19:00 па Варшаве) | Практычны воркшоп:
Упакоўка і адаптацыя ідэй, падрыхтоўка сціслага пітчу ды яго тэставанне на іншых удзельніках.
14 кастрычніка (11:30–16:30 па Варшаве) | Афлайн-нэтворкінг у Варшаве:
Жывая сустрэча, прэзентацыя паспяховых калабарацый, пітчынгі і прафесійныя знаёмствы.

Звярніце ўвагу: далучыцца да фінальнага пітчынгу змогуць толькі тыя, хто пройдзе поўны курс, у тым ліку анлайн-воркшопы.

Фарматы ўдзелу і дэдлайны

На этапе рэгістрацыі можна выбраць адзін з двух варыянтаў:

Уся праграма (анлайн + афлайн): для тых, хто хоча прапрацаваць сваю ідэю, падрыхтаваць пітч і прэзентаваць яго на нэтворкінгу.

Дэдлайн: да 20 верасня, 23:59 (па Варшаве). Вынікі адбору — да 22 верасня.

Толькі афлайн-нэтворкінг (14 кастрычніка): для тых, хто мае гатовы праект ці экспертызу і хоча знайсці новых партнёраў.

Дэдлайн: да 6 кастрычніка, 23:59 (па Варшаве). Вынікі адбору — да 8 кастрычніка.

Удзел у праграме бясплатны.

Кампенсацыя праезду: удзельнікам афлайн-сустрэчы магчыма пакрыццё выдаткаў на дарогу наземным транспартам з іншых гарадоў Польшчы, а таксама з Літвы ці Германіі.

Праграма праходзіць у закрытым фармаце і прадугледжвае папярэднюю верыфікацыю. Адбор адбываецца на конкурснай аснове (улічваецца матывацыя, наяўнасць ідэі і баланс профіляў у групе).

Падаць заяўку і зарэгістравацца можна тут.