Зяленскі: ЗША, падобна, спрабуюць схіліць Украіну да капітуляцыі
Рэдакцыя Reform.news · 19 кастрычніка 2026, 07:57
https://reform.news/be/zjalenski-zsha-padobna-sprabujuc-shilic-ukrainu-da-kapituljacyi/ЗША робяць крокі, якія, падобна, накіраваныя на тое, каб схіліць Украіну да капітуляцыі. Пра гэта Bloomberg заявіў прэзідэнт Украіны Уладзімір Зяленскі.
“Складваецца ўражанне, што робяцца крокі, мэта якіх — схіліць Украіну да капітуляцыі. Я не сцвярджаю, што менавіта такую мэту пераследуюць нашы партнёры. Мне не хочацца думаць, што нашы амерыканскія партнёры мяркуюць, быццам вайну можна завяршыць хутчэй за кошт Украіны. Але выглядае гэта менавіта так”, – сказаў ён.
Уладзімір Зяленскі адзначыў, што перыяд перад прамежкавымі выбарамі ў ЗША будзе вельмі складаным.
“Наперадзе небяспечныя дні — напярэдадні выбараў. Мая прапанова была такой: мы не чапаем расійскі дызель, а вы даяце нам ракеты для сістэм Patriot, каб мы маглі абараніць нашы аб’екты. Але ад нас патрабуюць толькі спыніць атакі на НПЗ. А калі мы працягнем наносіць удары, нам пагражаюць адключэннем ад чагосьці яшчэ”, – сказаў ён.
Украінскі прэзідэнт пры гэтым не выключае, што пасля амерыканскіх выбараў, якія пройдуць 3 лістапада, сітуацыя можа стаць больш спакойнай.
“У перадвыбарны перыяд палітыка становіцца вельмі агрэсіўнай. Цяпер назіраецца свайго роду агонія, але пасля выбараў жыццё працягнецца, і, думаю, стане спакайней», – сказаў ён.
Пакуль жа ЗША абмяжоўваюць працу ваеннай версіі Starlink, затрымліваюць пастаўкі ракет для комплексаў Patriot, у тым ліку і тых, якія ўжо былі аплачаныя. Цяпер, паводле слоў украінскага прэзідэнта, ЗША перадаюць толькі 12 ракет-перахопнікаў у месяц.
«Думаю, што ў прэзідэнта Злучаных Штатаў сапраўды добрыя адносіны з Пуціным. Але ёсць адзін нюанс: на дадзены момант Трамп не можа прымусіць Пуціна спыніць вайну», – дадаў ён.
Прэзідэнт ЗША Дональд Трамп тым часам у чарговы раз абвінаваціў Уладзіміра Зяленскага ў тым, што той не хоча ісці на мірнае пагадненне. Ён таксама патлумачыў свой учынак з законам Ліндсі Грэма аб “пякельных санкцыях”. Трамп падпісаў указ аб іх увядзенні, але тут жа прыпыніў дзеянне санкцый. Паводле яго слоў, гэта зроблена, каб не адштурхнуць Пуціна ад стала перамоваў, а таксама ўтрымаць яго ад падтрымкі Ірана.