Аляксандр Лукашэнка падчас перамоў са спецпасланнікам прэзідэнта ЗША Джонам Коўлам у чарговы раз адмаўляў наяўнасць у Беларусі палітвязняў. Таксама ён падкрэсліў, што ў яго няма неабходнасці саджаць людзей у турмы па палітычных матывах, таму што ўсе працэсы ў краіне пад кантролем. Адначасова Лукашэнка канстатаваў, што працягнуў саджаць тых, хто парушае законы.
“Джон, і яшчэ адна заўвага. Вельмі шмат размоў перад нашай з вамі тут сустрэчай наконт вызвалення, як вы іх называеце, палітвязняў. Хаця я яшчэ раз заклікаю вас да таго, каб мы не ўводзілі сябе ў зман. Ніякіх палітвязняў у Беларусі няма, таму што няма такога артыкула ў нашым заканадаўстве.
Але пра гэта вельмі шмат гавораць: пра вызваленне людзей, якія (вы як юрыст, адвакат гэта выдатна разумееце) паводле закона знаходзяцца пад следствам або ў папраўча-працоўных калоніях.
Я падводжу вас да галоўнай тэмы. Нашы беглыя раскручваюць тэму на Захадзе і вас, адчуваю, паводле маіх звестак, пераканалі ў тым, што мы кагосьці тут адпускаем, але, працягваючы рэпрэсіі, на гэтае месца ў два разы больш затрымліваем людзей. Я хачу публічна вам сказаць, што гэта абсалютная няпраўда.
У нас няма такой мэты замест вызваленых людзей адпраўляць новых людзей у папраўча-працоўныя калоніі. Такой у нас праблемы няма, мы гэтага не робім і рабіць не будзем. Гэта нашы беларусы.
Але калі хтосьці з грамадзян Беларусі і прысутных тут неграмадзян парушыць беларускія законы, мы абавязкова будзем рэагаваць паводле закона. І калі яны заслугоўваюць знаходзіцца пад следствам або ў папраўча-працоўных калоніях, яны будуць там знаходзіцца. Але гэта абсалютна не звязана з палітыкай. Нам няма неабходнасці палітычна сёння кагосьці пераследаваць. Абсалютна ніякай неабходнасці няма, таму што ўсе працэсы ў Беларусі знаходзяцца пад кантролем”, – сказаў ён.
У Крымінальным кодэксе Беларусі ёсць шэраг артыкулаў, якія часцей за іншыя выкарыстоўваюцца ўладамі пры вынясенні прысудаў людзям, якіх пасля праваабаронцы прызнаюць палітычнымі зняволенымі. Гаворка ідзе пра артыкулы, якія прадугледжваюць адказнасць за абразу Лукашэнкі, абразу прадстаўнікоў улады, распальванне варожасці, за садзейнічанне і фінансаванне экстрэмізму, удзел у экстрэмісцкіх фарміраваннях. Таксама ў Беларусі выкарыстоўваюцца абвінавачанні ў тэрарызме і здрадзе дзяржаве для пераследу апанентаў Лукашэнкі. Сёння беларускія праваабарончыя арганізацыі прызналі палітвязнямі яшчэ 11 чалавек. У іх прысудах фігуруюць у тым ліку пералічаныя вышэй артыкулы.
