Урад Чэхіі рыхтуе рашэнне, якое будзе прынята ў найбліжэйшыя тыдні і спросціць атрыманне чэшскіх віз для сваякоў беларусаў, якія жывуць у краіне. Пра гэта паведамляе АПК са спасылкай на запэўненні гендырэктара па справах Еўропы МЗС Чэхіі Аны Губачкавай, якая сустрэлася з намеснікам старшыні Аб’яднанага пераходнага кабінета Паўлам Латушкам.
У сустрэчы таксама прынялі ўдзел пасол Чэхіі ў Польшчы Бжэціслаў Данчак і кіраўнік “Беларускага дома ў Варшаве” Алесь Зарэмбюк.
Падчас сустрэчы Павел Латушка расказаў пра стратэгію двух напрамкаў, у якой ЗША выкарыстоўваюць свае механізмы для вызвалення палітвязняў і спынення рэпрэсій, а Еўрасаюз настойвае на сістэмных зменах у краіне.
Губачкава адзначыла, што гэта падыход, які Чэхія падтрымлівае, бо важна дасягнуць сістэмных змен у Беларусі.
Бакі таксама пагадзіліся, што, нягледзячы на вызваленне палітвязняў, сітуацыя ў Беларусі не змянілася, а беспрэцэдэнтны ўзровень рэпрэсій захоўваецца.
На сустрэчы Павел Латушка расказаў пра дзейнасць інстытутаў дэмакратычных сіл, пра дэлегацыі Каардынацыйнай рады ў найважнейшых еўрапейскіх міжпарламенцкіх інстытутах, а таксама пра сітуацыю ў беларускай культуры, якую рэжым Лукашэнкі пры падтрымцы Крамля мэтанакіравана русіфікуе з мэтай змены менталітэту беларусаў, і пра працу, якую праводзіць НАУ па прыцягненні да адказнасці прадстаўнікоў рэжыму Лукашэнкі.
Губачкава пацвердзіла пазіцыю Чэшскай Рэспублікі адносна поўнай салідарнасці з дэмакратычнымі сіламі Беларусі і гатоўнасці працягваць падтрымку, адзначыўшы, што Чэшская Рэспубліка памятае, як гэта, калі ў краіне дыктатура і палітычныя зняволеныя знаходзяцца ў турмах.
