У Польшчы назвалі ўмовы для «змястоўнага дыялогу» з Беларуссю
Рэдакцыя Reform.news · 24 верасня 2026, 20:46
https://reform.news/be/u-polshchy-nazvali-movy-dlja-zmjasto-naga-dyjalogu-z-belarussju/Намеснік міністра замежных спраў Польшчы Марцін Баса́цкі заявіў, што Варшава бачыць у апошніх дзеяннях Беларусі зніжэнне напружанасці на мяжы і вызваленне палітвязняў, аднак лічыць неабходным далейшае спыненне «агрэсіўных жэстаў» з боку Мінска.
Віцэ-міністр зрабіў гэтую заяву, адказваючы на пытанне журналістаў Slawa TV пра сустрэчу кіраўніка польскага МЗС Радаслава Сікорскага з міністрам замежных спраў Беларусі Максімам Рыжанковым у Нью-Ёрку.
«Ужо на працягу некалькіх месяцаў мы назіраем жэсты і дзеянні. Жэсты — гэта адно, канкрэтныя дзеянні — гэта іншае. І яны зніжаюць — асабліва калі гаворка ідзе пра Польшчу, але не толькі пра Польшчу — агрэсіўнасць дзеянняў Беларусі ў адносінах да суседзяў. Гэтыя жэсты — гэта вызваленне на гэты момант ужо каля 800 палітычных зняволеных. Вядома, яшчэ некалькі соцень палітычных зняволеных, на жаль, дагэтуль знаходзяцца ў турмах Лукашэнкі. Мы пра гэта не забываем, але каля 800 зняволеных былі вызваленыя», — адзначыў Баса́цкі.
Яшчэ адной зменай Баса́цкі назваў зніжэнне міграцыйнага ціску на польска-беларускай мяжы.
«Таксама назіраецца вельмі істотнае паслабленне гібрыднага ціску на Польшчу і Еўропу на беларуска-польскай мяжы. Тут сёлета сапраўды адбыўся прарыў. Магчыма, ён не цалкам спыніўся, але амаль спыніўся. Цяпер гэтыя спробы складаюць некалькі працэнтаў ад таго, што было на працягу папярэдніх 4–5 гадоў. Мы ведаем, што ўсё гэта было штучным і што яго ініцыявалі беларускія спецслужбы. Гаворка ідзе пра міграцыйны ціск на ўсходнюю мяжу не толькі Польшчы, але і ўсяго Еўрапейскага саюза», — заявіў ён.
Паводле слоў намесніка міністра, на гэтым фоне пачаўся палітычны дыялог паміж Варшавай і Мінскам, сімвалам якога стала сустрэча Сікорскага і Рыжанкова ў Нью-Ёрку.
«Што будзе далей — ці стане гэта прарывам, ці гэта толькі разавы жэст — я не бяруся меркаваць. Мы, вядома, хацелі б падтрымліваць добрыя адносіны з усімі суседзямі, але гэтыя суседзі не павінны праяўляць агрэсію. Думаю, гэта і ёсць адказ на ваша пытанне пра тое, якія польскія ўмовы для змястоўнага дыялогу з Беларуссю, каб беларускі бок, улічваючы тыя жэсты і дзеянні, якія ён распачаў на працягу апошніх некалькіх месяцаў, цалкам спыніў агрэсіўныя жэсты са свайго боку», — падкрэсліў ён.
Нагадаем, пра сустрэчу Сікорскага і Рыжанкова ў Нью-Ёрку паведамлялася 23 верасня. Польскі міністр расказаў, што бакі абмеркавалі сітуацыю на мяжы і рэгіянальную бяспеку. Паводле слоў Сікорскага, ён таксама ўздымаў пытанне пра тое, каб Беларусь не дазваляла расійскім дронам і ракетам пралятаць над сваёй тэрыторыяй.
Сікорскі назваў сустрэчу першай азнаямляльнай. Ён таксама паведаміў, што Польшча неўзабаве адкрые новы будынак свайго пасольства ў Мінску. Паводле слоў міністра, Варшава гатовая паляпшаць адносіны з суседзямі, калі для гэтага з’яўляюцца ўмовы.
На пытанне пра магчымае прызнанне Аляксандра Лукашэнкі польскім урадам Сікорскі адказаў, што Польшча як дзяржава прызнае дзяржавы, а не ўрады.
«Гэта як пралеска, якая можа расцвісці, калі надвор’е будзе спрыяць», — сказаў ён, адказваючы на пытанне пра нармалізацыю адносін з Беларуссю.
У МЗС Беларусі пацвердзілі сустрэчу. Там заявілі, што Рыжанкоў і Сікорскі абмеркавалі стан беларуска-польскіх адносін, шляхі іх далейшага развіцця і сітуацыю ў рэгіёне.