Следчы камітэт РФ узбудзіў крымінальную справу па факце замаху на забойства генерал-лейтэнанта Мінабароны РФ Уладзіміра Аляксеева на паўночным захадзе Масквы.
Справа заведзена паводле ч. 3 арт. 30 і ч. 1 арт. 105 КК РФ (замах на забойства), а таксама паводле ч. 1 арт. 222 КК РФ (незаконны абарот агнястрэльнай зброі).
Паводле даных следства, 6 лютага 2026 года ў жылым доме на Валакаламскай шашы невядомы зрабіў некалькі стрэлаў у мужчыну, пасля чаго ўцёк з месца здарэння.
Пацярпелы быў шпіталізаваны ў адну са сталічных бальніц.
На месцы працуюць следчыя і крыміналісты сталічнага ўпраўлення СК. Вывучаюцца запісы камер відэаназірання, апытваюцца відавочцы.
Праводзяцца следчыя дзеянні і аператыўна-вышуковыя мерапрыемствы, накіраваныя на ўстанаўленне асобы або асоб, датычных да злачынства, паведамілі ў прэс-службе СК РФ.
Як піша Baza, невядомы некалькі разоў стрэліў у спіну Аляксееву. Паводле слоў відавочцаў, напад адбыўся на лесвічнай пляцоўцы жылога дома, калі генерал выходзіў з кватэры. Жыхары чулі стрэлы і крыкі аб дапамозе — пазней яны ўбачылі самога Аляксеева ў крыві, які нейкі час быў прытомны. Адна з суседак крычала, каб выклікалі «хуткую».
Паводле даных Shot, Аляксеев знаходзіцца ў цяжкім стане, за яго жыццё змагаюцца лекары.
Уладзімір Аляксеев з 2011 года займае пасаду першага намесніка начальніка ГРУ.
