СК раскрыў схему нявыплаты падаткаў у бізнесе па рамонце аўтамабіляў

Рэдакцыя Reform.news · 10 лістапада 2026, 15:45

https://reform.news/be/sk-raskry-shemu-njavyplaty-padatka-u-biznese-pa-ramonce-a-tamabilja/

Следчы камітэт заявіў аб раскрыцці схемы са штучным драбненнем бізнесу для ўхілення ад выплаты падаткаў. У дачыненні да 51-гадовага бізнесмена з Мінска распачата крымінальная справа.

Паводле даных следства, мужчына з’яўляўся заснавальнікам і дырэктарам прыватнага гандлёвага ўнітарнага прадпрыемства, якое займалася абслугоўваннем і рамонтам грузавых аўтамабіляў. Каб знізіць падатковую нагрузку, бізнесмен фармальна падзяліў бізнес паміж трыма прадпрыемствамі, хаця рамонт праводзіўся ў адных і тых жа боксах тымі ж работнікамі.

Асноўная кампанія працавала па агульнай сістэме падаткаабкладання з выплатай ПДВ і падатку на прыбытак. У 2021 і 2022 гадах мінчанін зарэгістраваў яшчэ дзве камерцыйныя арганізацыі і перавёў іх на спрошчаную сістэму падаткаабкладання без выплаты ПДВ. У якасці заснавальніка адной з кампаній выступаў знаёмы бізнесмена, які не меў дачынення да рэальнага кіравання фірмай.

Выручка кампаній размяркоўвалася такім чынам, каб новыя арганізацыі не перавышалі ўстаноўленыя ліміты для прымянення спрошчанай сістэмы падаткаабкладання, а падатковая база асноўнай кампаніі штучна заніжалася.

Следчы камітэт падлічыў, што з 2021 года па 2024 год сума нявыплачаных падаткаў перавысіла 1,256 млн рублёў.

Падчас праверак выняты ўстаноўчыя дакументы, дагаворы пазыкі, базы «1С: Бухгалтерия», дапытаныя дзясяткі работнікаў прадпрыемстваў.

У дачыненні да бізнесмена распачата крымінальная справа па факце ўхілення ад выплаты падаткаў у буйным памеры (ч. 2 арт. 243 КК). Абвінавачаны прызнаў віну і да завяршэння расследавання добраахвотна кампенсаваў прычыненую дзяржаве шкоду ў поўным аб’ёме, выплаціў пені і штрафы. Справа перададзена ў пракуратуру для накіравання ў суд.