Аляксандр Лукашэнка падпісаў указ “Аб стварэнні Акадэміі інтэлектуальных тэхналогій”. Яна пачне падрыхтоўку спецыялістаў з 1 верасня 2027 года. Навучанне будзе ахопліваць натуральныя навукі, прамысловыя і лічбавыя тэхналогіі і іншыя “перспектыўныя напрамкі”, паведамілі ў прэс-службе Лукашэнкі.
Паступленне ў Акадэмію будзе праходзіць па асаблівым парадку ў фармаце рэспубліканскага конкурсу. Удзельнічаць у адборы змогуць выпускнікі школ, навучэнцы каледжаў і студэнты ВНУ, спецыялісты прадпрыемстваў і навукоўцы. На папярэднім этапе ў Мінску, абласных цэнтрах і буйных гарадах кандыдатам прапануюць прадставіць уласную крэатыўную ідэю, распрацоўку, вынаходства або рацыяналізатарскую прапанову.
Фінальны этап будзе праходзіць непасрэдна ў Акадэміі ў фармаце практычнага інтэнсіву. Удзельнікам трэба будзе выконваць індывідуальныя і групавыя заданні, публічна абараняць праекты і здаваць унутранае ўступнае выпрабаванне.
Да выкладання плануюць прыцягнуць навукоўцаў і выкладчыкаў, кіраўнікоў і спецыялістаў прадпрыемстваў з досведам у навуковай, інавацыйнай і вытворчай сферах, “якія дасягнулі значных поспехаў у навуковай, інавацыйнай і вытворчай сферах”.
Праграмы навучання змогуць карэктавацца з улікам запытаў галін. Студэнты змогуць выбіраць спецкурсы, сумежную прафілізацыю і спецыяльнасць. Прадугледжана навучанне на прадпрыемствах і праца над рэальнымі вытворчымі задачамі, а таксама індывідуальныя і групавыя навукова-даследчыя праекты.
Па выніках навучання выпускнікі павінны будуць здаць дзяржаўны экзамен і абараніць стартап-праект або прыкладную навукова-даследчую працу.
Каардынаваць працу Акадэміі і кантраляваць яе дзейнасць будзе назіральны савет на чале з міністрам адукацыі. У яго ўвойдуць кіраўнікі профільных міністэрстваў і ведамстваў, Нацыянальнай акадэміі навук і Парка высокіх тэхналогій.
Апрабаваныя ў Акадэміі эксперыментальныя адукацыйныя праграмы і методыкі плануецца пасля ўкараняць у іншых установах адукацыі.
“Стварэнне Акадэміі дазволіць сфарміраваць гнуткае, міждысцыплінарнае навукова-адукацыйнае асяроддзе новага тыпу, якое будзе арыентавана на практычны вынік і інтэгравана ў рэальныя эканамічныя працэсы з улікам патрэб краіны”, – гаворыцца ў прэс-рэлізе.
