Стартаваў набор у бясплатную анлайн-школу для беларусак з уразлівых груп

Прадстаўніца Аб’яднанага пераходнага кабінета Беларусі па пытаннях эканомікі і фінансаў Аліса Рыжычэнка абвясціла пра пачатак набору ў бясплатную анлайн-школу для беларусак з уразлівых груп. Праект створаны з мэтай дапамагчы жанчынам атрымаць сучасныя навыкі, устойлівасць і новыя прафесійныя магчымасці. Набор адкрыты з сённяшняга дня.

Школа разлічана на беларусак, якія:

• перажылі рэпрэсіі або былі палітвязнямі;
• маюць сваякоў-палітвязняў;
• з’яўляюцца маці-адзіночкамі ў эміграцыі;
• выхоўваюць дзяцей з асаблівасцямі развіцця;
• сутыкнуліся са стратай прафесіі, вымушаным пераездам або неабходнасцю пачынаць кар’еру нанова.

Арганізатары падкрэсліваюць, што ў школе важныя не толькі навучанне, але і падтрымка, павага і разуменне.

«Гэты праект стаў для мяне асаблівай місіяй. Вельмі важна ствараць магчымасці і падтрымліваць тых, хто перажыў цяжкасці, каму давялося пачынаць усё нанова, шукаць сябе ў эміграцыі, сумяшчаць клопат пра сям’ю з намаганнямі па пабудове новага жыцця. Я веру, што адукацыя і доступ да сучасных навыкаў могуць стаць рэсурсам, які дапамагае вярнуць упэўненасць і адкрыць новыя дзверы», — заявіла Рыжычэнка.

У школе прапануюцца наступныя курсы:

• Праграмаванне: React + Node.js Full-Stack;
• Business English B1: Размоўная ўпэўненасць;
• Рэзюмэ + LinkedIn: Прафесійны брэндынг;
• Фрыланс: старт і ўстойлівы даход;
• AI-памочнікі для працы.

Усе курсы бясплатныя і накіраваныя на атрыманне практычных навыкаў, якія дапамагаюць будаваць устойлівую кар’еру ў любой кропцы свету.

Падаць заяўку можна на сайце.