Фото: ГСЧС Украины
Расія працягвае масіраваную паветраную атаку на ўкраінскія гарады. Налёт пачаўся ўчора ўдзень. Сёння ноччу расійскі бок актыўна атакаваў Кіеў і вобласць.
Як паведамілі ў ДСНС Украіны, у Дарніцкім раёне ўкраінскай сталіцы было траплянне ў шматпавярховы жылы дом. Яго канструкцыі разбураныя. На раніцу ўдалося выратаваць 27 чалавек. Працягваюцца пошукі людзей пад заваламі.
Усяго ў Кіеве па стане на 7:30 мясцовага часу вядома пра 31 пацярпелага, у тым ліку адно дзіця. Таксама адзін чалавек загінуў.
Наступствы ўдараў ліквідуюцца ў пяці раёнах сталіцы, у тым ліку абломкі пашкодзілі кватэру на 12 паверсе жылога будынка, ёсць траплянне ў недабудаваны дом. Таксама беспілотнік урэзаўся ў пяціпавярховік.
У Кіеўскай вобласці пацярпелі 7 чалавек, у тым ліку адно дзіця. Пашкоджаныя жылыя дамы, гаспадарчыя пабудовы, аўтамабілі.
Паводле інфармацыі Паветраных сіл УСУ, з 18 гадзін 13 мая РФ выпусціла па Украіне 731 сродак паражэння, у тым ліку 675 беспілотнікаў і 56 ракет. Перад гэтым удзень 13 мая расіяне ўжылі каля 800 беспілотнікаў.
Украінская СПА ноччу і раніцай змагла нейтралізаваць 41 ракету, у тым ліку 29 крылатых ракет Х-101 і 12 балістычных ракет “Іскандэр-М”/С-400, а таксама 652 беспілотнікі.
Зафіксаваныя траплянні 16 ракет і 23 беспілотнікаў у 24 месцах, а таксама падзенне абломкаў беспілотнікаў у 18 лакацыях.
Атака працягваецца.