Фото: unsplash.com
Сейм Літвы ў аўторак прыняў да разгляду законапраект аб забароне на ўезд у краіну прадстаўнікам культуры і індустрыі забаў, якія працуюць у Расіі і Беларусі. За разгляд праекта прагаласавалі 84 дэпутаты, пяцёра ўстрымаліся, галасоў супраць не было.
Гэта ўжо другая спроба правесці гэты законапраект у літоўскім парламенце. Ён быў ініцыяваны кансерватарамі. У красавіку праект не быў падтрыманы на стадыі прадстаўлення. Яго вярнулі на дапрацоўку. Новая версія практычна не змянілася, адзначае LRT.
Праект прадугледжвае забарону ўезду ў Літву на тэрмін да пяці гадоў замежнікам, якія актыўна падтрымліваюць або ўдзельнічаюць у дзейнасці іншай дзяржавы, што парушае прынцыпы і нормы міжнароднага права, а таксама якія пасля 24 лютага 2022 года ажыццяўлялі культурную, канцэртную, забаўляльную або звязаную з гэтым дзейнасць у Расіі, Беларусі або на акупаваных тэрыторыях.