Савет па развіцці прадпрымальніцтва накіраваў Мінэканомікі прапановы па змяненні закона «Аб гаспадарчых таварыствах». Міністэрства праводзіла прававы маніторынг яго прымянення.
Як паведамілі ў СРП, былі накіраваныя наступныя прапановы:
- пашырэнне кола суб’ектаў, якія могуць быць заснавальнікамі гаспадарчага таварыства, а менавіта: уключэнне ў яго інвестыцыйных фондаў і іх даверных кіраўнікоў;
- удасканаленне парадку размеркавання маёмасці, якая засталася пасля завяршэння разлікаў з крэдыторамі пры ліквідацыі гаспадарчага таварыства;
- пашырэнне пераліку выпадкаў датэрміновага спынення паўнамоцтваў без прыняцця рашэння агульнага сходу ўдзельнікаў або савета дырэктараў (у выпадку спынення працоўных адносін па абставінах, якія не залежаць ад волі бакоў, па патрабаванні, заяўленым работнікам у аднабаковым парадку, у адпаведнасці з заканадаўствам аб працы);
- замацаванне тэрміна «незалежны дырэктар», вызначэнне крытэрыяў яго незалежнага статусу і ролі ў складзе Назіральнага савета гаспадарчага таварыства;
- вызначэнне пераліку дакументаў гаспадарчага таварыства, якія прадастаўляюцца яго ўдзельнікам, і парадку прадастаўлення інфармацыі;
- прадастаўленне ўдзельнікам таварыства права самастойна вызначаць магчымасць і механізмы выхаду з таварыства; вызначэнне выразнага механізму выключэння з таварыства яго нядобрасумленнага ўдзельніка.
Акрамя таго, было прапанавана дапоўніць закон механізмам падзелу долі ў статутным фондзе юрыдычных асоб паміж мужам і жонкай, у тым ліку былымі. Таксама прапануецца замацаваць юрыдычную сілу паведамленняў і абмену дакументамі, накіраванымі з выкарыстаннем лічбавых сродкаў сувязі шляхам электроннай пошты, мэсанджараў, сістэмы электроннага дакументаабароту.
🔥
Падтрымайце Reform.news данатам!