Фото: МИД
Міністр замежных спраў Беларусі Максім Рыжанкоў у першы дзень візіту ў Танзанію правёў шэраг сустрэч на высокім узроўні. Ён не скупіўся на запрашэнні наведаць Мінск з афіцыйным візітам.
Як паведамілі ў МЗС Беларусі, падчас сустрэчы з прэм’ер-міністрам Танзаніі Мвігулу Нчэмбай Рыжанкоў перадаў пасланне Лукашэнкі прэзідэнту Танзаніі Саміі Сулуху Хасан з запрашэннем наведаць Беларусь з афіцыйным візітам у зручны час.
Падчас перамоў абмяркоўвалася канвертацыя “высокага ўзроўню палітычнага ўзаемадзеяння” ў “практычныя вынікі ў гандлёва-эканамічнай сферы”. Бакі адзначылі магчымасць інтэнсіфікацыі супрацоўніцтва ва ўсіх галінах, у першую чаргу ў сферы эканомікі, з мэтай арганізацыі паставак тавараў, запатрабаваных у абедзвюх краінах. Таксама ішла гаворка аб пашырэнні дагаворна-прававой базы.
“Падчас сустрэчы кіраўніком урада Танзаніі вызначаны шэраг перспектыўных напрамкаў двухбаковага супрацоўніцтва, па якіх дадзены адпаведныя ўказанні і даручэнні ўпаўнаважаным ведамствам для неадкладнай прапрацоўкі з беларускімі зацікаўленымі. Прэм’ер-міністр Танзаніі запрасіў свайго беларускага калегу Аляксандра Турчына наведаць Танзанію з візітам да канца бягучага года”, – распавялі ў МЗС.
Рыжанкоў таксама правёў перамовы з Міністрам замежных спраў і ўсходнеафрыканскага супрацоўніцтва Танзаніі Махмудам Табітам Комба. Ён запрасіў танзанійскага калегу наведаць Мінск з візітам у адказ.
Бакі абмеркавалі мерапрыемствы, прымеркаваныя да 30-годдзя з дня ўстанаўлення дыпламатычных адносін. Падчас перамоў была адзначана неабходнасць “стварэння сумеснай гандлёвай камісіі для распрацоўкі алгарытмаў кратнага павелічэння ўзаемнага тавараабароту, вываду ў практычную стадыю рэалізацыі патэнцыйных сумесных праектаў у такіх галінах, як механізацыя сельскай гаспадаркі, стварэнне харчовай бяспекі, адукацыя, пастаўка ўгнаенняў і лагістыка, з акцэнтам на грузавых авіяперавозках і выкарыстанні партовай інфраструктуры”.
Максім Рыжанкоў таксама правёў перамовы з профільнымі міністрамі. З міністрам адукацыі Адольфам Мкендам абмяркоўвалася павелічэнне колькасці студэнтаў з Танзаніі, якія навучаюцца ў беларускіх ВНУ, візіт дэлегацыі міністэрства з удзелам прадстаўнікоў танзанійскіх ВНУ.
“На перамовах Рыжанкова з Міністрам жывёлагадоўлі і рыбалоўства Танзаніі Башыру Аллі Какурвай бакі абмеркавалі пытанні трансферу беларускіх тэхналогій у галінах селекцыі і ветэрынарыі, а таксама арганізацыі візіту прадстаўнікоў аграрнага сектара Танзаніі ў Беларусь на выставу «Белагра-2026» з мэтай пашырэння супрацоўніцтва ў сферах жывёлагадоўлі, аквакультуры і біятэхналогій, уключаючы пастаўкі беларускіх кармоў для жывёл і рыбы. Танзанійскі бок выказаў зацікаўленасць у беларускіх тэхналогіях вытворчасці ветэрынарных вакцын, пастаўках біяактыўных дабавак для патрэб жывёлагадоўлі, а таксама селекцыі генетычнага матэрыялу буйной рагатай жывёлы”, – дадалі ў МЗС.
У першы дзень візіту былі падпісаны мемарандумы аб супрацоўніцтве паміж Нацыянальным цэнтрам падтрымкі экспарту Беларусі і Гандлёва-прамысловай палатай Танзаніі, Цэнтрам па развіцці гандлю Танзаніі, Фондам прыватнага сектара Танзаніі.