Скриншот видео
Пастаянны прадстаўнік Беларусі пры ААН Валянцін Рыбакоў на пасяджэнні Савета Бяспекі ААН, прысвечаным атацы на беларускі аўтобус у Бранскай вобласці Расіі, назваў тып выкарыстанага беспілотніка. Паводле яго слоў, гэта БПЛА ўкраінскай вытворчасці.
«Сёння ў нас ёсць доказы, каб адказна заявіць: атака на беларускі аўтобус была здзейсненая ўдарным БПЛА ўкраінскай вытворчасці. Гэты БПЛА належыць да тыпу Darts і абсталяваны паражальнымі элементамі. Ён мае баявую частку з масай выбуховага рэчыва каля 1200 г у трацілавым эквіваленце», — сказаў ён.
Рыбакоў адзначыў, што на месцы здарэння былі канфіскаваныя аб’екты з маркіроўкай на ўкраінскай мове.
«Такія беспілотнікі з’яўляюцца распрацоўкай украінскай групы інжынераў «Сталёвыя шэршні» і выкарыстоўваюць тэхналогію кіравання FPV. Падчас агляду месца здарэння былі канфіскаваныя аб’екты з маркіроўкамі на ўкраінскай мове. Сярод такіх аб’ектаў — блок кіравання дэтанатарам, выраблены на заводзе ў Шостцы Сумскай вобласці. Сам дэтанатар, а таксама акумулятарная батарэя з’яўляюцца кампанентамі, вырабленымі ва Украіне.
Беспілотнікі гэтага тыпу выпускаюцца на розных украінскіх прадпрыемствах, у тым ліку ў саматужных умовах. Кошт вытворчасці складае каля 1000 долараў ЗША. Асноўнымі эксплуатантамі гэтай сістэмы з украінскага боку з’яўляюцца падраздзяленні Галоўнага ўпраўлення разведкі, Службы бяспекі Украіны і розныя часці Узброеных сіл Украіны», — сказаў ён.
Разам з тым пастаянны прадстаўнік Беларусі не сказаў, хто менавіта атакаваў аўтобус. Ён асудзіў удар, назваўшы яго правакацыяй, накіраванай на эскалацыю канфлікту і на ўцягванне Беларусі ва ўзброены канфлікт паміж Расіяй і Украінай. Рыбакоў падкрэсліў, што адсутнасць хуткай і жорсткай рэакцыі з боку Мінска не трэба разглядаць як праяву слабасці, нерашучасці ці баязлівасці.
Рыбакоў таксама адзначыў, што на тэрыторыі Беларусі ў дзень атакі быў выяўлены яшчэ адзін дрон.
«Адзін з нядаўніх выпадкаў — выяўленне 17 чэрвеня 2026 года аналагічнага дрона, ідэнтычнага таму БПЛА, які ў той жа дзень здзейсніў атаку на беларускі аўтобус у Бранскай вобласці Расійскай Федэрацыі, у Лельчыцкім раёне Гомельскай вобласці Рэспублікі Беларусь. Корпус дрона, які ўпаў, быў накіраваны фюзеляжам у паўночным і паўночна-ўсходнім напрамку палёту, гэта значыць з Украіны ў Расію праз Беларусь.
Я наўмысна прыводжу гэты канкрэтны прыклад, паколькі следчымі Рэспублікі Беларусь устаноўлена, што БПЛА, выяўлены ў Гомельскай вобласці Беларусі, і дрон, які выкарыстоўваўся для атакі на беларускі аўтобус з дзецьмі ў Бранскай вобласці Расійскай Федэрацыі, забяспечаныя аднолькавымі кампанентамі і ўяўляюць сабой адзін і той жа тып дронаў. Устаноўлена, што абодва БПЛА, і ў Бранскай вобласці Расіі, і ў Гомельскай вобласці Беларусі, знаходзіліся па стане на 17 чэрвеня 2026 года ў межах зоны дасяжнасці сігналу для чатырох падраздзяленняў Узброеных сіл Украіны, размешчаных у Чарнігаўскай і Сумскай абласцях.
Калі б Беларусь звярталася з просьбамі аб скліканні пасяджэння Савета Бяспекі па кожным інцыдэнце з БПЛА на сваёй тэрыторыі, такіх сустрэч магло б быць больш, чым рэгулярных штомесячных пасяджэнняў па пункце парадку дня Савета “падтрыманне міжнароднага міру і бяспекі ва Украіне”», — заявіў Рыбакоў.