Рост рэальных даходаў насельніцтва запаволіўся ў лютым

Рэальныя наяўныя грашовыя даходы насельніцтва Беларусі ў студзені-лютым выраслі на 7,2% у параўнанні з аналагічным перыядам мінулага года. У студзені гэтага года прырост даходаў складаў 7,5%. Для параўнання: за 2025 год паказчык павялічыўся на 9,6%.

Афіцыйным прагнозам сацыяльна-эканамічнага развіцця на 2026 год, зацверджаным указам Лукашэнкі, прадугледжаны рост даходаў насельніцтва на 4,8%.

Структура грашовых даходаў у студзені-лютым 2026 года выглядала наступным чынам:

• аплата працы — 64,9%;
• трансферты насельніцтву (пенсіі, дапамогі, стыпендыі і іншыя трансферты насельніцтву) – 23,2%;
• даходы ад прадпрымальніцкай і іншай дзейнасці, што прыносіць даход, – 7%;
• даходы ад уласнасці і іншыя даходы – 4,9%.

У структуры даходаў знізілася доля аплаты працы і даходаў ад уласнасці, але пры гэтым вырасла доля трансфертаў насельніцтву.

Рэальныя наяўныя грашовыя даходы ўяўляюць сабой грашовыя даходы за вылікам падаткаў, збораў і ўзносаў, скарэкціраваныя на індэкс спажывецкіх цэн на тавары і паслугі.