Расійскі газавоз атакаваны ў Міжземным моры

Рэдакцыя Reform.news · 4 сакавіка 2026, 11:46

https://reform.news/be/rasijski-gazavoz-atakavany-mizhzemnym-mory/

3 сакавіка ў непасрэднай блізкасці ад тэрытарыяльных вод Рэспублікі Мальта здзейснена атака на расійскае судна — газавоз «Арктык Метагаз». Танкер ішоў з грузам з порта Мурманск, паведамляе прэс-служба Мінтранса Расіі.

“Дзякуючы зладжаным дзеянням мальтыйскіх і расійскіх выратавальных службаў усе 30 членаў экіпажа, грамадзяне Расіі, выратаваны”, – гаворыцца ў паведамленні.

У Мінтрансе РФ упэўненыя, што напад нібыта “здзейснены з узбярэжжа Лівіі безэкіпажнымі катарамі Украіны”. Ніякіх доказаў гэтай заяве не прыводзіцца.

Расійскі бок запэўнівае, што танкер ішоў з грузам, “аформленым па ўсіх міжнародных правілах”.

https://twitter.com/hand_poseidon/status/2028769204812321058

***

Судна Arctic Metagaz – адно з прыкладна дзесяці газавозаў, якія выкарыстоўваюцца для транспарціроўкі санкцыянаванага СПГ з расійскага тэрмінала “Арктык СПГ-2” у порт Бэйхай на паўднёвым узбярэжжы Кітая. 24 лютага 2026-га Arctic Metagaz пакінуў порт Мурманска пасля пагрузкі і, верагодна, ішоў у напрамку егіпецкага порта Суэц, указвае gCaptain. З 2024 года карабель знаходзіцца пад санкцыямі ЗША і Вялікабрытаніі.