«Расатам» плануе да канца года падпісаць рамкавае пагадненне аб будаўніцтве трэцяга энергаблока БелАЭС

Рэдакцыя Reform.news · 12 сакавіка 2026, 15:20

https://reform.news/be/rasatam-planue-da-kanca-goda-padpisac-ramkavae-pagadnenne-ab-buda-nictve-trjecjaga-jenergabloka-belajes/

«Расатам» разлічвае да канца 2026 года выйсці на падпісанне рамкавага пагаднення аб будаўніцтве трэцяга энергаблока Беларускай АЭС. Пра гэта заявіў генеральны дырэктар дзяржкарпарацыі Аляксей Ліхачоў на галіновым мерапрыемстве «Дзень інфармавання».

“Разам з беларускімі калегамі працуем над фінансавымі і тэхнічнымі ўмовамі будаўніцтва. Да канца года павінны выйсці на падпісанне адпаведнага рамкавага пагаднення”, — прыводзіць яго словы газета “Страна Росатом”.

У цэлым у 2026 годзе «Расатам» плануе запусціць чатыры энергаблокі.

Нагадаем, напярэдадні пра пачатак падрыхтоўкі рамкавага пагаднення паведаміў міністр энергетыкі Беларусі Дзяніс Мароз. Паводле яго слоў, сумесная рабочая група Мінэнерга і «Расатама» ўжо правяла некалькі пасяджэнняў.

Ключавымі задачамі на 2026 год міністр назваў завяршэнне падрыхтоўкі рамкавага пагаднення, падпісанне кантракта і заключэнне міжурадавага пагаднення паміж Беларуссю і Расіяй.