Прэтэнзіі літоўскага МУС да Вольгі Карач і яе арганізацыі “Наш дом” могуць быць звязаныя з садзейнічаннем у легалізацыі асоб, якія супрацоўнічаюць з замежнымі спецслужбамі. Пра гэта гаворыцца ў заяве МУС Літвы.
“Асаблівую занепакоенасць выклікае таксама дзейнасць публічнай установы «Наш дом» пад кіраўніцтвам В. Карач. Паводле даных ДДБ, гэтая ўстанова стварае спрыяльныя ўмовы для ўезду ў Літву і легалізацыі там асоб, якія супрацоўнічаюць са спецслужбамі варожых краін.
Паколькі гэтая арганізацыя абвешчаная экстрэмісцкай у Беларусі, такі статус штучна стварае спрыяльныя ўмовы для звязаных з ёй асоб, якія не адпавядаюць крытэрыям міжнароднай абароны, для атрымання віду на жыхарства ў Літве з Беларусі. ДДБ таксама ўказвае на тое, што падобная схема спрыяе злоўжыванню правам на міжнародную абарону”, – гаворыцца ў паведамленні МУС, якім міністэрства пашырыла заяву кіраўніка ведамства Марцінаса Кацелінаса.
Нагадаем, сёння раніцай міністр унутраных спраў Літвы Марцінас Кацелінас паведаміў, што ведамства папросіць праваахоўныя органы яшчэ раз праверыць Вольгу Карач і яе арганізацыю.
У 2023 годзе Дэпартамент міграцыі МУС Літвы адмовіў Карач у прадастаўленні міжнароднай абароны са спасылкай на заключэнне Дэпартамента дзяржаўнай бяспекі краіны, які палічыў, што актывістка ўяўляе пагрозу нацыянальнай бяспецы.
“Паводле даных Дэпартамента дзяржаўнай бяспекі, В. Карач актыўна распаўсюджвае ў сацыяльных сетках інфармацыю, якая адпавядае расійскай прапагандысцкай рыторыцы, дыскрэдытуе Літву, прыніжае падтрымку Украіны і распальвае недавер да дзяржаўных інстытутаў.
Паводле даных ДДБ, беларуская актывістка В. Карач супрацоўнічала з расійскімі спецслужбамі ў 2015-2019 гадах.
Нагадваем, што Вышэйшы адміністрацыйны суд Літвы ў сваім рашэнні ад 10 студзеня 2024 года па адміністрацыйнай справе № eA-995-575/2024, якое не падлягае абскарджанню, заявіў, што «заяўніца не ўказала абставін, якія абвяргаюць факты яе супрацоўніцтва з адпаведнымі расійскімі службамі. Выснова Дэпартамента дзяржаўнай бяспекі аб тым, што заяўніца ўяўляе пагрозу дзяржаўнай бяспецы, з’яўляецца абгрунтаванай і заснаванай на фактах», – адзначаецца ў прэс-рэлізе МУС Літвы.
У ім таксама гаворыцца, што Дэпартамент міграцыі павінен будзе праверыць, ці няма ў Карач і іншых асоб, якім было адмоўлена ў прытулку, яшчэ аднаго грамадзянства альбо магчымасці выехаць у трэцюю бяспечную краіну.
Пасля атрымання ўсіх ацэнак МУС прыме рашэнне ў дачыненні да асоб, якія ўяўляюць пагрозу нацыянальнай бяспецы, а таксама аб магчымых сістэмных рашэннях.