Некалькі дзён таму Reform.news апублікаваў відэа з прусакамі ў пякарні «Цьеры». Дзяўчына, якая захавала на відэа прусакоў на сваім століку, расказвала ў сацсетках, што на яе скаргу персанал адрэагаваў будзённа, як быццам такое для іх – норма. На наступны дзень у Threads з’явілася яшчэ адно відэа – тыя ж прусакі ў тым жа «Цьеры», але цяпер яны паўзлі па прылаўку з тартамі.
«Цьеры ў Дане як звычайна», – падпісала сваё відэа ў Threads Вікторыя Раеўская.
А сёння цэнтр гігіены і эпідэміялогіі Першамайскага раёна Мінска закрыў кафэ-пякарню «Цьеры» ў Dana Mall да ліквідацыі парушэнняў.
«Абставіны, адлюстраваныя ў сацыяльнай сетцы, пацвердзіліся, у сувязі з чым у дачыненні да адказнай службовай асобы пачаты адміністрацыйны працэс, — цытуе урачоў-гігіеністаў агенцтва «Мінск-Навіны». — У адрас кафэ вынесена патрабаванне аб прыпыненні дзейнасці да ліквідацыі парушэнняў».
У сацсетках ужо з’явіліся фота зачыненага кафэ.