Невядомыя пішуць былым палітвязням з акаўнта @dapamoga_pzk і прапануюць запоўніць форму нібыта для атрымання дапамогі, паведамляе праваабарончы цэнтр «Вясна».
Паводле інфармацыі праваабаронцаў, акаўнт можа быць звязаны з беларускімі сілавікамі. Невядомыя могуць прадстаўляцца супрацоўнікамі арганізацый і ініцыятыў, якія аказваюць дапамогу палітвязням і былым палітвязням, у тым ліку «Вясны».
Праваабаронцы заклікаюць не перадаваць асабістыя даныя невядомым і не запаўняць падазроныя формы, а таксама рэкамендуюць правяраць акаўнты, якія прапануюць дапамогу, праз афіцыйныя сайты і старонкі адпаведных арганізацый.
У «Вясне» таксама адзначылі, што калі з чалавекам звязваюцца ад імя арганізацыі, праверыць прыналежнасць акаўнта можна праз @ViasnaSOS. Пра выпадкі рассылкі падобных формаў праваабаронцы просяць паведамляць праз @Viasnainfo у Telegram.
